La propuesta de Donald Trump pa Gaza, presentada como un “plan de paz”, ye en realidá un esquema de rendición condicionada. Nun se fala equí de negociación nin de xusticia, sinón d’imposición. El presidente de los Estaos Xuníos propón un guión nel que la parte palestina tien que desarmase, ceder control del so territoriu y aceptar condiciones dictaes dende fuera, ensin drechu real a decidir el so futuru.
La rendición nun ye paz
Trump vende’l plan como si aliviara la presión sobro Israel, pero lo que fai ye reforzar el so poder. El mensaxe ye claru: si Hamas y el pueblu palestín nun acepten les condiciones, vendrán “consecuencies desagradables”. Esa llingua, más cercana al ultimátum que a la diplomacia, amuesa que nun se trata d’una paz, sinón d’una capitulación forciada.
Occidente achanta
Mentantu, n’Europa y n’otros países occidentales, la reacción ye’l silenciu. Nun ye neutralidá: ye complicidá. De la mesma manera que se caltién la dependencia militar y económica col aliáu israelín, acéutase la imposición ensin cuestionar los sos efeutos reales. Trump “silba” y Occidente asitia, ensin más.
Ese silenciu tien costes: da lluz verde a un modelu qu’elimina la voz palestina, que marxina’l so drechu a la soberanía y que consagra’l control d’un solu bandu. El resultáu ye una paz de cartón, un futuru diseñáu dende arriba ensin la participación de los afeutaos.
Un conflictu qu’afeuta a tolos pueblos
Esti plan nun tien namás implicaciones pal Prósimu Oriente. Ye tamién un exemplu de cómo’l poder global s’impón sobro los pueblos ensin respetar la so voz nin la so historia. Y equí ye onde mos toca reflexonar: ¿qué papel xueguen los pueblos pequeños y les sos movilizaciones frente a estes dinámiques?
La fuercia de la presión social
La movilización y la presión social ye la principal aportación que se-y pue faer al Pueblu Palestín y a la so llibertá. Tenemos que facelo como asturianes y asturianos que tamién lluchamos pola llibertá d’Asturies, y qu’aspiramos a un mundiu xustu formáu por pueblos llibres y soberanos. La solidaridá nun ye un xestu simbólicu: ye un compromisu políticu y éticu.
Pa finar
Trump pue proponer planes de rendición, pero nun pue borrar la memoria nin la resistencia d’un pueblu. La verdadera paz namás pue llegar dende’l respetu a los drechos y la dignidá del Pueblu Palestín. Y nesa llucha, la voz de la xente, la movilización popular y la solidaridá internacional siguen siendo la ferramienta más poderosa.
*Llucía Fernández Marqués
