Andecha Astur quier manifestar públicamente la so oposición rotunda a los denominaos “planes de viabilidá y reestructuración” presentaos por Duro Felguera, por entender que nun tán orientaos a garantizar la continuidá industrial nin el futuru del emplegu n’Asturies, sinón a facilitar la desapaición del control asturianu sobre una de les empreses más emblemátiques del nuestru país.
Los planes anunciaos inclúin fondos cambeos operativos nel funcionamientu del grupu que, de facto, van suponer la desapaición de media plantía, el perdón dafechu de la delda empresarial y la venta d’una empresa histórica a capital foriatu, col consiguiente riesgu de deslocalización y perda de capacidá industrial.
Duro Felguera tien previsto crear una nueva sociedá, MidCo, de la que van depender les dos principales llinies d’actividá del grupu: la d’EPC (proyeutos d’inxeniería “llave en man”, que inclúin diseñu, suministru y construcción) y la d’Servicios, con un enfoque más orientáu a contrataos parciales y subcontratación.
Amás, la empresa anunció la venta de les filiales Felguera Tecnoloxíes de la Información (FTI) y DF Intelligent Systems, y la liquidación de DF Oil & Gas, DFOM Biomasa y DF Green Tech, esta cabera la sociedá d’enerxíes renovables na que la direición anterior depositara grandes esperances, pero que nun consiguió consolidar proyectos viables pa la compañía.
Dende Andecha Astur queremos dexar claro que esto nun ye una reestructuración nin un plan de futuru, ye un auténticu espoliu industrial, un pasu más na entrega de la economía asturiana a intereses foriaos.
Nun falamos d’una reestructuración: falamos de media plantía na cai, del perdón total de la delda empresarial y de la venta d’una empresa histórica asturiana a capital foriatu. Si’l Gobiernu tien 100 millones pa rescatar fondos y autopistes, tamién podría tener esos mesmos 100 millones pa comprar Duro Felguera y convertila nuna empresa pública, venceyada a Navantia y al sector naval estatal.
La organización considera que la creación d’una empresa pública Duro Felguera sedría una alternativa viable y socialmente xusta, con participación del Gobiernu Asturianu, que garantizaría la continuidá de la actividá industrial, la innovación y la investigación n’un sector estratéxicu pa la soberanía económica del país.
Amás, cola reapertura d’una o dos mines públiques, podría abastecese’l carbón precisu pa producir aceru propiu pa Navantia, evitando la dependencia de multinacionales y recuperando una cadena productiva asturiana propia. Eso sedría soberanía industrial asturiana, eso ye planificación económica y defensa de la clas trabayadora.
P’Andecha Astur, la política económica actual del Estáu español y del Gobiernu Asturianu ta marcada pola sumisión a los intereses de los fondos d’inversión, ensin una visión a llargu plazu nin una planificación que garantice emplegu estable, innovación y proteición del texíu productivu autóctonu.
Les quites, los despidos y les ventes a fondos nun son reestructuración: son una nueva entrega d’Asturies a intereses ayenos. Poro, Andecha Astur reclama:
-
El control públicu d’empreses estratéxiques como Duro Felguera, Hunosa o Arcelor.
-
La intervención del Gobiernu Asturianu pa garantizar el futuru del emplegu industrial.
-
Y un plan real de recostrucción de la industria asturiana, basáu en criterios sociales, ecolóxicos y soberanos, que ponga los recursos al serviciu del país y de la clas trabayadora.
El futuru d’Asturies nun pue siguir dependiendo de los fondos d’inversión nin de los xuegos especulativos del mercáu. Si queremos una Asturies viva, tien de producir pa sí mesma, non pa los mercaos.
