La retirada de más de 9,5 millones d’euros de fondos europeos confirma lo que llevamos décades denunciando: el «Principado» ye una institución impuesta dende Madrid pa xestionar la decadencia asturiana.
Dende Andecha Astur denunciamos la inutilidá, la incompetencia y el desenfotu del Gobiernu del «Principado» tres la retirada de 9.513.106 euros de fondos europeos FEADER destinaos al desendolcu rural. Asturies executó namás el 62,52 % de los recursos correspondientes a 2023, frente al 85 % establecíu como referencia.
A esta situación amiéstense los retrasos denunciaos na xestión de los fondos Next Generation, con 217 millones pendientes de pagu y 52 millones ensin movilizar, según les cifres presentaes pola oposición na Xunta Xeneral. Nun son necesariamente fondos perdíos, pero sí otra muestra de les graves deficiencies na xestión autonómica.
Dende Andecha Astur consideramos qu’Adrián Barbón ye non solo un llacayu de Madrid, sumisu y servil a los intereses de los sos amos, sinón tamién un incompetente incapaz de xestionar los recursos disponibles pa defender el futuru d’Asturies.
Estos fechos perafiten lo que llevamos décades denunciando: el «Principado» ye una institución impuesta dende Madrid, carente de soberanía real, que sirve pa xestionar la decadencia asturiana, afondar na desindustrialización, destruir el texíu socioeconómicu tradicional y provocar la emigración forciada de la mocedá.
Mientres el nuesu campu pierde recursos, la industria sigue debilitándose y la mocedá vese foricao a emigrar, el Gobiernu autonómicu demuestra la so incapacidá pa aprovechar les oportunidaes disponibles. Andecha Astur defende la recuperación de la economía tradicional, la construcción d’un espaciu económicu asturianu y un país onde la mocedá pueda desendolcar el so futuru ensin vese obligada a emigrar.
Nun aceptamos que la dependencia de Madrid sirva d’esculpa pa la incompetencia de Barbón. Reclamamos responsabilidaes polítiques, tresparencia sobro los fondos europeos desaprovechaos y una política económica al serviciu d’Asturies.
Dende Andecha Astur perafitámosmos nel nuesu apueste pola soberanía nacional.
Nun queremos más llacayos de Madrid nin alministradores de la decadencia. Queremos una Asturies soberana, reindustrializada y con futuru pa la so xente.
