Esti martes 8 de setiembre, Día de la Nación Asturiana, la militancia d’Andecha Astur aconceyará a les 12:00 hores nel nuesu llocal de Xixón pa analizar les prósimes elleiciones nacionales y estatales y definir la llinia política de la organización a curtiu y mediu plazu.
El 8 de setiembre ye pal soberanismu asturianu una fecha d’afirmación nacional, un díi nel que reafitamos la esistencia d’Asturies como nación y el drechu del nuesu pueblu a decidir llibremente’l so futuru. Un plantegamientu que dende Andecha Astur llevamos décades defendiendo públicamente nel Díi de la Nación Asturiana, entendiendo que la reivindicación nacional namás cobra sentíu si va acompañada d’un proyeutu políticu capaz de tresformar la realidá del país.
Por eso, esti martes vamos aprovechar una fecha especialmente simbólica pa la nuestra organización pa celebrar un Conceyu Estraordinariu d’Andecha Astur, a partir de les 12:00 hores nel nuesu llocal de Xixón.
Nun momentu políticu nel que s’averen nuevos procesos elleutorales y nel que Asturies sigue ensin disponer de les ferramientes polítiques necesaries pa decidir sobre’l so presente y el so futuru, consideramos necesario abrir un procesu coleutivu d’analís y decisión.
Ún de los asuntos centrales del Conceyu va ser la posición d’Andecha Astur énte les prósimes elleiciones nacionales y estatales. La nuestra organización siempre entendió les elleiciones como una ferramienta política, non como un fin en sigo mesmu. Yá nel Conceyu Nacional #YeAsturies plantegábemos conxuntamente’l debate sobre la llinia política, el programa y la estratexa énte les distintes convocatories elleutorales.
D’esi procesu salió una definición clara d’Andecha Astur como una alternativa asturiana d’izquierdes y soberanista, cola voluntá de construyir un proyeutu políticu propiu pal país. El documentu de llinia política y elleiciones aprobáu nel Conceyu Nacional marcó entós criterios pa intervenir nos procesos elleutorales ensin perder de vista que’l nuesu oxetivu nun ye simplemente consiguir representación institucional, sinón contribuir a la construcción d’una alternativa nacional y social p’Asturies.
Esa mesma independencia de criteriu llevómos posteriormente a descartar la participación nes elleiciones estatales de 2023 cuando entendimos que participar nelles nun ayudaba al procesu d’acumulación de fuercies nin a la creación d’un espaciu políticu asturianu propiu.
Agora toca volver analizar la situación.
El Conceyu Estraordinariu va valorar les distintes posibilidaes que s’abren énte les prósimes convocatories, les condiciones nes que tendría sentíu la participación d’Andecha Astur y les posibles fórmules de collaboración política que puedan contribuyir a fortalecer una alternativa soberanista asturiana.
Pero’l debate nun va quedar reducíu a les elleiciones.
Vamos tratar especialmente la llinia política d’Andecha Astur a curtiu y mediu plazu: les prioridaes de trabayu, la presencia social de la organización, la intervención nos conflictos que vive’l país, la rellación col restu de fuercies soberanistes y d’izquierdes y les ferramientes necesaries pa facer xorrecer una alternativa política específicamente asturiana.
Asturies enfréntase a problemes cada vegada más graves: perda y avieyamientu de población, emigración forciada de la mocedá, precarización del emplegu, falta de vivienda, destrucción del territoriu, turistificación, perda de capacidá industrial y ausencia de poder políticu real pa decidir sobre los nuesos propios recursos.
Pa nós, la respuesta a estos problemes sigue pasando pela soberanía. Non como una declaración abstracta, sinón como la capacidá efeutiva del Pueblu Asturianu pa decidir qué facer col so territoriu, cola so economía y colos sos recursos. Una idega que perafitamos esti mesmu branu al recordar que la soberanía ye una ferramienta pa construyir el futuru d’Asturies.
Esti 8 de setiembre, poro, nun queremos namás reivindicar Asturies.
Queremos pensar Asturies, organizanos y decidir cómo siguir construyendo una alternativa nacional, soberanista y d’izquierdes al serviciu del Pueblu Asturianu.
Porque’l futuru del país nun va venir decidíu dende fuera.
El futuru d’Asturies tenemos que construyilu nós.
Conceyu Estraordinariu d’Andecha Astur
Martes 8 de setiembre — Día de la Nación Asturiana
12:00 hores
Llocal d’Andecha Astur — Xixón
Asturies nación. Asturies soberana.
