Andecha Astur reclama a la Conseyería competente n’Igualdá, a la Delegación del Gobiernu español n’Asturies y al Conceyu Xixón una evaluación de la coordinación institucional, los recursos d’acoyida y los procedimientos de siguimientu de les muyeres en situación de riesgu.
Andecha Astur esixe al Gobiernu del Principáu d’Asturies, a la Delegación del Gobiernu español y al Conceyu de Xixón que revisen los mecanismos de protección escontra la violencia machista tres l’asesinatu de Covadonga Patricia, de 30 años, asocedíu’l pasáu 12 de payares en Xove.
La organización considera que les declaraciones institucionales de condena y los tres díes de llutu oficial tienen que dir acompañaos de midíes concretes pa garantizar la seguridá de les muyeres que sufren violencia machista.
Les informaciones facilitaes poles instituciones confirmen que Covadonga Patricia tuvo acoyida na Casa Malva y, más tarde, n’otru recursu de protección. Tamién se confirmó la esistencia d’una orde de protección y l’activación de los mecanismos de comunicación correspondientes cuando dexó de pernoctar nel recursu d’acoyida.
Énte estes circunstancies, Andecha Astur formula les siguientes esixencies a les alministraciones responsables.
Al Gobiernu del Principáu d’Asturies y a la Conseyería competente n’Igualdá
- Realizar una evaluación téunica de los protocolos de protección y del funcionamientu de la rede asturiana d’acoyida.
- Revisar los procedimientos de siguimientu cuando una muyer abandona un recursu residencial, garantizando la so autonomía y los sos derechos.
- Informar de los recursos humanos, económicos y materiales disponibles pa la protección de les muyeres en situación d’altu riesgu.
- Presentar un plan de meyora con actuaciones concretes, presupuestos, responsables y plazos d’execución.
A la Delegación del Gobiernu español n’Asturies
- Evaluar los mecanismos de coordinación ente les fuerces de seguridá y los servicios autonómicos y municipales de protección.
- Informar, dientro de les llendes llegales, del funcionamientu de los procedimientos de comunicación y siguimientu de les situaciones d’altu riesgu.
- Proponer les meyores necesaries pa reforzar la coordinación institucional y la protección efectiva de les víctimes.
- Actualización y meyora de los protocolos del sistema VioGen
Al Conceyu de Xixón
- Revisar la coordinación de los servicios municipales d’igualdá y atención social colos recursos autonómicos y estatales.
- Garantizar que les muyeres en situación de riesgu dispongan d’información, asesoramientu y acompañamientu accesibles.
- Promover una evaluación de les necesidaes municipales de prevención y atención frente a la violencia machista.
Andecha Astur reclama, amás, que los resultaos xenerales d’estes evaluaciones se faigan públicos, respetando la privacidá de les víctimes y la investigación xudicial, y que les alministraciones competentes comparezan pa esplicar les actuaciones previstes.
Andecha Astur tien nidio que solicitar una revisión de los protocolos nun implica dar por acreditaos incumplimientos o neglixencies, sinón exercer el control democráticu sobro unos servicios públicos esenciales.
«El Principáu, la Delegación del Gobiernu y el Conceyu de Xixón tienen que dar respuestes concretes. Nun basta con condenar cada asesinatu y declarar díes de llutu: hai que revisar los protocolos de protección, garantizar recursos y adoptar les meyores que seyan necesaries».
Andecha Astur considera que la llucha escontra la violencia machista tien que ser una responsabilidá permanente de toles alministraciones. La prevención, la protección efectiva y la coordinación institucional tienen que traducise en compromisos verificables.
