La organización considera necesariu’l dragáu y reclama garantíes pa les agües, los hábitats y la población, amás d’una xestión segura de los sedimentos.
Andecha Astur presentó alegaciones al proyectu de dragáu de mantenimientu del puertu d’Avilés y al recintu terrestre previstu pa recibir parte de los materiales extraíos. L’escritu reclama resolver les incertidumes ambientales y fixar condiciones comprobables pa protexer la ría y la salú de la población.
La organización considera necesariu’l dragáu pa garantizar la seguridá de la navegación y l’actividá portuaria. Con esi puntu de partida, les alegaciones busquen una planificación que faiga compatible’l funcionamientu del puertu cola recuperación ambiental de la ría.
Garantíes pa les agües y la xestión de los sedimentos
Les alegaciones reclamen resolver, anantes de concluyir la evaluación ambiental, les incertidumes sobro la movilización de contaminantes y el tratamientu de les agües. La modelización de turbidez nun demuestra por sí sola la seguridá química del vertíu. Precísense ensayos representativos, un balance de contaminantes y garantíes de que les operaciones nun van deteriorar les agües nin afeutar a espacios sensibles como la Charca de Zeluán y la Ensenada de Llodero.
La clasificación de los sedimentos tien que facese antes de mecer los llotes, con controles que determinen la so peligrosidá y les condiciones de xestión. Andecha Astur reclama acreditar la capacidá real del recintu, los plazos d’almacenamientu y les autorizaciones y disponibilidá de los destinos finales, incluyíos L’Estrellín y el depósitu marín frente a Xagó. Tamién pide alternatives operatives pa los materiales que nun puedan aceptase nel destín previstu.
Proteición de les dunes y de la población
La ocupación de terrenos en L’Espartal obliga a evaluar la afección a les dunes y a la flora protexida, les repercusiones sobro Natura 2000 y les posibilidaes de reducir la superficie ocupada. El treslláu de plantes nun garantiza por sí solu la recuperación del hábitat. Les alegaciones soliciten comparar emplazamientos y soluciones técnicamente viables, y fixar con claridá los volúmenes, les cotes y el calendariu de les operaciones.
La proteición de la población requier evaluar los golores y el ruíu nes viviendes realmente ocupaes, con atención a L’Arañón, San Xuan de Nieva y L’Altu del Buscón. La clasificación urbanística del suelu nun basta pa descartar la presencia de persones espuestes. Han concretase midíes preventives, controles y condiciones de reducción o parada de l’actividá, xunto cola prevención de fugues al suelu y a les agües soterrañes.
Condiciones vinculantes y control públicu del dragáu
Andecha Astur reclama, amás, comprobar les obligaciones derivaes de les campañes anteriores y evaluar el balance de sable de les sableres y les dunes. El siguimientu ambiental ha contar con responsables, presupuestu, llendes d’actuación y publicación de los informes y resultaos analíticos, amás d’un plan de cierre del recintu.
Coles alegaciones presentaes, Andecha Astur reclama una respuesta razonada a les cuestiones plantegaes y una solución ambientalmente viable. La necesidá del dragáu ha acompañase de garantíes comprobables antes de l’autorización, condiciones vinculantes y control públicu durante tola execución.
Consulta les alegaciones completes
Descargar les alegaciones d’Andecha Astur al dragáu del puertu d’Avilés (PDF, 10 páxines).
Información rellacionada
- Andecha Astur lleva al Parllamentu Européu la contaminación en Xixón
- La Comisión Europea pide desplicaciones pola contaminación tres les xestiones d’Andecha Astur
Semeya d’archivu de la ría d’Avilés dende Zeluán: José Luis Blanco (Xareu bs) / Wikimedia Commons, dominiu públicu.
