Inicio > Conceyos > Andecha Astur presenta en Piloña una propuesta pal diseñu d’un plan d’emerxencia pa les fasteres inundables
Conceyos

Andecha Astur presenta en Piloña una propuesta pal diseñu d’un plan d’emerxencia pa les fasteres inundables

Nel escritu presentáu na Casa Conceyu de Piloña, Andecha Astur plantega una riestra midíes pa evitar les consecuencies d’inundaciones asemeyaes a les del pasáu mes de xineru.

La propuesta complementa la rializada en Parres, y les entrugues presentaes nel Senáu español pol senaor Jon Iñarritu (EH-Bildu), en nome d’Andecha Astur pa determinar responsabilidaes, igües ya iniciatives poles inundaciones del pasáu mes de xineru.

A los efeutos de xustificación d’esta propuesta considérense los fechos que darréu se rellaten:

  1.  Ente les inundaciones sofríes nel añu 2007 l’alcalde d’entós, Juan Roberto Pérez (PP), desixó a la CHC y a la empresa pública FEVE que tomaren le midíes necesaries pa torgar inundaciones comu les d’aquel añu, qu’afeutaron al cascu urbanu de L’Infiestu. Desixó entós el caltenimientu afayaízu de les víes y les sos cunetes, asina comu canalizar la riega La Maragata, que recueye l’agua del monte Cayón y la carretera estatal 634.
  2.  En xunu de 2010 desbordáronse varios tramos del ríu Piloña, prevocando’l pieslle de centros educativos, inundación de cases y cais, cortes de carretera y víes férrees, al tiempu que quedó ensin llínies de FEVE haza Santander, cortaes demientres selmanes pol esbarrumbamientu d’una ponte y poles obres pa retirar barros.
  3.  El BOE de 20 de xunu de 2011 espubliza un determín de la Secretaría d’Estáu del Cambiu Climáticu (del 7 de xunu), del Ministeriu de Mediu Ambiente, Mediu Rural y Marín, sobro la evaluación del impautu ambiental del proyeutu Restauración fluvial del baxu Sella (namái al so pasu pelos conceyos de Cangues d’Onís, Parres y Ribesella). Esti proyeutu, afaláu pola CHC, tenía comu oxetivos la recuperanza de los procesos fluviales que definen la dinámica ñatural del ríu y de la resiliencia l’ecosistema; asina comu la recuperanza de los valores paisaxísticos y l’afitamientu d’infracadarmes que permitan l’usu caltenible del ríu. El plan incluyía la retirá d’ostáculos nel calce y nes veres, retirá d’espigones y escolleres ensin foncionalidá, retirá de varios rellenos, recuperanza de la vera’l ríu, recuperanza de la biesca de ribera, control d’especies vexetales invasores, etc. Los documentos de trabayu d’esti plan reconocíen “l’alta inundabilidá de los tarrenos que son oxetu del estudiu”, asinando a la mayor parte d’estes tierres un periodu de torna d’aveníes inferior a 50 años y, en munchos casos, inferior a 10 años; poro l’Alministración española reconoz espresamente nestos documentos que “con determiná frecuencia asoceden importantes desbordamientos en grandes fasteres de la llanura aluvial del tramu baxu del Sella, afeutando a poblaciones asitiaes na mesma”. Estos documentos de trabayu reconocen tamién la esistencia de tramos erosionaos na vera’l ríu que menacien la estabilidá de les víes férrees. Lo más grave ye que, esti proyeutu, escluyía l’actuación nel conceyu Piloña, magar qu’ésti tenía y tien problemes en materia d’inundaciones equivalentes a los de los conceyos del baxu Sella incluyíos nel proyeutu.
  4.  Nes inundaciones asocedíes en xineru de 2019 los efeutivos de Bomberos y Proteición Civil tuvieron de desaloxar a una familia del conceyu, cuandu’l so llar convirtiérese yá una islla y l’agua aportába-yos a les rodielles, teniendo amás un neñu de dos años. Al tiempu, el xorrecimientu’l ríu Piloña punxo n’allerta a los vecinos más averaos, asina comu a les autoridaes y cuerpos de seguranza y emerxencies, dau’l riesgu ciertu de daños mayores. Tamién se vieron afeutaes varies rutes de tresporte escolar.

 

 Y les propuestes qu’Andecha Astur faial Plenu de la Casa Conceyu de Piloña son:

  1.   Que desixa a la Confederación Hidrográfica’l Cantábricu (CHC) la redaición urxente d’un Plan d’emerxencia pa les fasteres inundables del conceyu Piloña, asegurando que na tramitación del plan puen tener participación activa tanto la Casa Conceyu de Piloña comu les asociaciones ciudadanes del conceyu.
  2.  Qu’entame iniciatives polítiques y llegales pa depurar les posibles responsabilidaes de los titulares de la CHC y del Ministeriu español correspondiente que nos caberos años permitieron que les agües fluviales añegaren repetíamente les tierres piloñeses.
  3.  Que, arrespondiendo al so compromisu de ser un Conceyu democráticu, facilite información público en materia d’inundaciones nel so territoriu, retrucando a les siguientes entrugues:
    • ¿Conoz la Casa Conceyu de Piloña’l mapa de fasteres inundables del conceyu? ¿Tien cuantificá la población que vive neses tierres inundables? ¿Conoz dalgún plan de l’alministración española pa la proteición d’eses fasteres inundables de Piloña?
    •  ¿Qué midíes conoz la Casa Conceyu de Piloña que punxenre en marcha la CHC nos caberos diez años y que tuvieren empobinaes a protexer la vecindá, propiedaes y tierres piloñeses de les inundaciones?
    •  ¿Qué prepuestos públicos conoz la Casa Conceyu de Piloña que taben destinaos a l’aplicación d’esos planes y actuaciones?
    •  ¿La Casa Conceyu de Piloña conoz les causes poles que Piloña foi escluío del proyeutu de restauración fluvial del baxu Sella anunciáu nel BOE de 2011? ¿Desendolcó la Casa Conceyu de Piloña dalguna iniciativa pa qu’esi plan de restauración del Sella incluyere les tierres piloñeses?
    •  ¿Qué iniciatives tomó la Casa Conceyu de Piloña dende 2007 fasta anguañu pa que la CHC y el Ministeriu español correspondiente cumplieren cola so obligación de protexer Piloña de les inundaciones?
    •  ¿La Casa Conceyu de Piloña pidió en dalgún momentu responsabilidaes económiques, alministratives, polítiques o llegales a los responsables de la CHC y del Ministeriu español correspondiente pola añegación continuá de tierres piloñeses?

 

 

Deja una respuesta

Tu dirección de correo electrónico no será publicada. Los campos obligatorios están marcados con *