Nel actu intervino Lluis Antón González, collaciu d’Andrés Solar nel Ensame Nacionalista Astur, y féxose un respasu a la evolución del nacionalismu asturianu de magar l’ausencia del homenaxeáu
L’actu, cellebráu a les puertes del cimenteriu Deva, onde dende 2004 Andecha Astur caltién una placa n’alcordanza d’Andresín, entamó cola interpretación a la gaita de la “Marcha d’Antón el neñu”, y continuó con unes pallabres improvisaes de Lluis Antón González sobro’l calter y el compromisu de ‘Andresín’, “un paisanu en tolos sentíos, nel meyor de los sentíos”.
Darréu tevo llugar la intervención política a cargu de Mariano Suárez, qu’en forma de carta a Andrés Solar, recordó’l so papel como profesor d’asturianu na Universidá Popular de Xixón y fexo un repasu de la evolución del nacionalismu asturianu de magar l’ausencia del homenaxeáu, pero sobro too, marcó lo que ye una llinia de compromisu y coherencia por aquellos que tovía podemos recitar al altu la lleva los sos versos
“Prúyemos un pueblu llibre
que nome cola so voz
los sos collacios y el pan
prúyemos un pueblu llibre
y una Asturies dixebrá”
sabiendo que seguimos calteniendo’l mesmu espíritu y el mesmu compromisu qu’espeyó Andrés Solar.
Pa finar tevo llugar la ofrenda floral, una llectura de los sos versos y el canciu de La Flor del Agua, nuna xornada na que s’honró la so dimensión humana y el so compromisu políticu.
