Inicio > Asturies > Andecha Astur refuga la visita de los Borbones
AsturiesPortada

Andecha Astur refuga la visita de los Borbones

Si vienen… ¡Asturies respuende!

Nun intentu, tan descaráu comu inútil, de blanquiar l’historial d’abusos y corrución de la corona española, Felipe VI y Letizia percuerren estremaos territorios del estáu, asonsañando que tienen interés en conocer la situación de los sos súbditos tres l’andanciu del COVID19.

Andecha Astur pide que la ruta de blanquiamientu de los Borbones nun pase per Asturies. La so presencia sedría una ofensa inecesaria. Los Borbones nun puen ser bien acoyíos porque la corona española ye preséu de dominación, heredera direuta del franquismu, pegollu vergoñosu del réxime’l 78, ñeru de toa triba de corruciones económiques y polítiques, falta de toa clas d’exemplaridá democrática y moral, y mecanismu medieval de tresmisión xenética del poder.

Sicasí, en prevención de lo que puea asoceder, Andecha Astur fae un llamáu públicu a les munches organizaciones que n’Asturies saben que nun somos un Principáu nin d’esta corona corrupta nin de nenguna otra, a tola ciudadanía que sabe qu’Asturies ye una tierra que nagua pola xusticia social y la llibertá pa la so xente.

Convitamos a estes organizaciones a que mos autoconvoquemos toos en conceyu abiertu en cuantes se conoza que los Borbones camienten triar suelu asturianu, considerando qu’entós Asturies tien d’entrar n’estáu d’alerta y organizar una rempuesta pública que refugue decidíamente tala visita.

N’alerta porque una Asturies moderna nun ye un pueblu sometíu a una corona.

N’alerta porque la solución de los problemes democráticos, llaborales, económicos, sanitarios, culturales, sociales… de les asturianes y asturianos sólo tendrán igua cuandu algamemos un nueu réxime, que sedrá de llibertaes, xusticia, democracia popular, y de reconocencia tanto de la diversidá identitaria comu del drechu a decidir.

Ési ye’l retu que tenemos y queremos asumir. Porque trátase de caltener la nuesa dinidá comu ciudadanos llibres y d’honrar la tradición de los nuesos antepasaos, que dieron la cara (y munchos la vida) pa defender los drechos de la clas trabayaora asturiana y pa que pudiéremos esfrutar d’Asturies comu tierra de xusticia y llibertá.

Poro, convitamos a toes y toos a espresar públicamente’l rechazu a una posible visita, pero tamién a tar sollertes y preparaos p’aconceyase en cuantes los Borbones anuncien la so intención de pisar Asturies pa bixordear d’una llexitimidá, d’una autoridá y d’una maxestá qu’enxamás nun tuvieron.

2 thoughts on “Andecha Astur refuga la visita de los Borbones

Deja una respuesta

Tu dirección de correo electrónico no será publicada. Los campos obligatorios están marcados con *