“La Soberanía garantiza la supervivencia del Pueblu Asturianu”

Na intervención política nel actu d’homenaxe a la Declaración de Soberanía del Conseyu d’Asturies y Llión destacóse la necesidá de recuperar la soberanía perdía como ferramienta imprescindible pa garantizar el futuru d’Asturies

Esti añu, por mor de la borrina, la xubía a les trincheres de L’Abidular- Filispardi, foi sustituyía pola visita a les casamates de Tarna, en reconocencia del pueblu asturianu n’armes que supo defender el país frente al exércitu facista español.

Tres d’esta visita a les casamates tevo llugar l’actu d’homenaxe delantre del monumentu que fai alcordanza d’esta hestórica declaración que dio aniciu a la cabera istitución democráticamente escoyía polos asturianos.

Ellí tuvo llugar la ufrienda floral y la intervención política corrió a cargu de Mariano Suárez, que tres faer un repasu a cómu al traviés de los sieglos el Pueblu Asturianu vien declarándose Soberanu frente a Castiella primero y a España dempués, los fechos hestóricos del momentu y a la importantísima repercusión hestórica de la declaración de soberanía pol dende entós Conseyu Soberanu d’Asturies y Llión. Pâsó aína a valorar la situación d’anguañu, con un “Principado” y un estatutu impuestu dende Madrid y victimes de la política española de desindustrialización y esfarrapamientu del texíu socioeconómicu y cultural d’Asturies.

Na so intervención Mariano Suárez destacó’l rixu del nuesu pueblu y la viabilidá social y económica cola que cuntamos p’afitar el futuru colleutivu y el progresu social, destacando la necesidá de recuperar la soberanía que perdiemos pola fuercia les armes, como ferramienta imprescindible p’avanzar nun proyeutu común que permita superar la situación que carecemos anguañu y garantizar la superviviencia como pueblu y avanzar haza una sociedá más xusta ya igualitaria.

Pa finar, perafitóse la reclamación de la República Asturiana como una continuidá hestórica d’aquella declaración de 1937 y tamién y sobro too, como únicu sistema que garantiza la llibertá, democracia y progresu d’esti pueblu.