La oficialidá, una vindicación programática d’Andecha Astur, pue algamase gracies a la llucha hestórica del Pueblu Asturianu, al que felicitamos por ello
Ye cierto qu’esiste una oportunidá hestórica p’algamar la reconocencia oficial de la llingua nacional d’Asturies. Sicasí, tenemos de tar sollertes pa qu’esta reconocencia seya con plenos drechos, y non sólo parcial comu deseyen dalgunos seutores. Son, precisamente, eses estayes de la esquierda española, que siempres tarrecieron la nuesa llingua, les qu’agora quieren modular los niveles de calidá democrática d’una oficialidá amestándo-y l’axetivu d’amable, defendiendo asina modelos d’oficialidá que reconoceríen al Pueblu Asturianu menos drechos y garantíes de supervivencia llingüística qu’a la ciudadanía de Catalunya, Euskadi o Galicia, esto ye una oficialidá de menor calidá democrática y, polo tanto, discriminaora ya inxusta.
Dende Andecha Astur sofitamos una oficialidá que, comu cualisquier otra norma, apaute drechos y obligaciones por parte les Alministraciones y la ciudadanía. Nun ye de pescanciar una oficialidá, por exemplu, ensin que l’asturianu seya la llingua vehicular del sistema educativu o ensin una presencia plena nos medios de comunicación públicos, dos drechos que sí se reconocen a catalanes, vascos y gallegos.
Tamién creyemos, comu l’Academia de la Llingua de los primeros tiempos, qu’Asturies tien una sola llingua, l’asturiana, con estremaes variantes (oriental, central, ocidental y eonaviega) que tienen de caltenese nos sos ámbetos al marxe de cuálu seya’l modelu d’oficialidá qu’entre en vigor.
Per otru llau, señalamos que foi’l Gobienu de la FSA-PSOE, con Adrián Barbón, el que s’emperruñó en mecer la probatible reconocencia la oficialidá con una reforma xeneral del “Estatutu d’Autonomía” que mos impón el réxime vixente. Énte esa situación, Andecha Astur dexa costancia ñidia de que nun ye un “Estatutu d’Autonomía” impuestu lo que tien de regular les rellaciones ente Asturies y l’Estáu español. Nós queremos que se dexe de castigar a Asturies col nomatu de “Principado” y qu’hebia un documentu políticu que podamos votar y qu’afite la rellación ente dambos territorios.
La postura d’Andecha Astur ye avanzar haza la soberanía, ensin renunciar nos procesos intermedios a algamar mayores cotes d’autogobiernu y, cómu non, a que se garanticen dafechu los drechos de les y los asturianos a vivir na nuesa llingua y a recuperar el padremuñu llingüísticu comu un valor de presente y futuru pa toa Asturies.
