Inicio > Asturies > Homenaxe y revindicación na comemoración de la Declaración de Soberanía
AsturiesPortada

Homenaxe y revindicación na comemoración de la Declaración de Soberanía

Un añu más Andecha Astur xunió l’actu comemorativu de la Declaración de Soberanía del Conseyu d’Asturies y Llión cola revindicación d’una Asturies Soberana nuna cellebración onde también hebio participación llionesa

La xornada entamó cola esforciada xubía al picu Filispardi, una de les cumes nes que’n so díi los héroes de la resistencia asturiana escavaron trincheres na mesma roca pa defender el país de la invasión facista, nuna demostración de valor que pudo camudar el cursu la hestoria. L’esfuerciu de la xubía y la vista dende lo alto son un actu previu importante pa poder comprender en fondura el compromisu d’aquellos homes y muyeres que llucharon por defender el Conseyu Soberanu d’Asturies y Llión y por conseguir una Asturies llibre.

Nel posterior homenaxe ya intervención política reivindicóse’l Conseyu Soberanu comu la cabera istitución democráticamente escoyía polos asturianos, darréu que l’estatutu d’autonomía que carecemos, y la propia denominación de «Principado» pa la nuesa nación, foi impuesta dende Madrí, ensin que los asturianos -nin los llioneses- pudieren votalu, a diferiencia d’otros pueblos del Estáu.

Llucía Fernández Marqués non solo remembró na so intervención la hestoria ya’l sinificáu del Conseyu Soberanu, sinón que se proyeutó dica’l presente les consecuencies del so derrocamientu per parte la España nacional y del posicionamientu antiasturianu de la mesma República Española que, ante la derrota asturiana “nun escondió’l so alliviu, dedicando a Belarmino y al Conseyu durísimes pallabres. La República Española prefirió una España facista, pero xunía, qu’una Asturies llibre”.

La influencia del odiu de les dos españes a tolo que implicaba una Asturies llibre continúa influenciando’l díi ente díi de los asturianos, con polítiques nidiamente enfilaes al desaniciu del texíu socioeconómicu, la cultura y la identidá asturianes y con dirixentes avergoñaos del pasáu del país, obedientes a Madrí ya interesaos namás en “repartise’l panchón”.

Por tou ello Llucía reclamó la República Asturiana comu heriedera del Conseyu y comu únicu camín pa recuperar un proyeutu nacional llideráu polos asturianos y  “que seya garantía de democracia, de respetu a los drechos individuales y colleutivos y l’apueste de futuru d’esti país d’homes y muyeres llibres, d’un pueblu soberanu del que formamos parte y qu’alita ente nós”

La participación nel actu de los llioneses apurrió mayor conteníu al actu al tornar a xunir nuna mesma revindicación de reconocimientu, memoria y dignidá a los dos pueblos implicaos nel ñacimientu del Conseyu Soberanu.

LLEER INTERVENCIÓN COMPLETA DE LLUCÍA FERNANDEZ

Deja un comentario

Tu dirección de correo electrónico no será publicada. Los campos obligatorios están marcados con *