Inicio > Asturies > Andecha Astur desixe a Barbón recurtiar puestos y sueldos nel gobiernu del «Principado»
AsturiesPortada

Andecha Astur desixe a Barbón recurtiar puestos y sueldos nel gobiernu del «Principado»

Andecha Astur desixe a Barbón un recorte de puestos y sueldos nel Gobiernu y na Xunta Xeneral pa dedicar l’aforru a inversión social.

Una clas dirixente menos numberosa, unos sueldos políticos púdicos y una llucha decidía escontra la corrución istitucional permitiríen ameyorar los sirvicios públicos y atender les grandes necesidaes sociales.

Andecha Astur considera que ye inaceptable que l’executivu de Barbón xorreza en puestos y en sueldos, y que vaiga costar a los asturianos un millón d’euros al añu más que l’anterior. Dos conseyeríes más, otres tres direiciones xenerales…, cola allegría de quien dispara con pólvora ayeno, claro.

Tenemos de remembrar dalgunos datos. El presidente d’Asturies, el vicepresidente, los nueve conseyeros y les tres viceconseyeres cobren cuasi 68.000 € añales. El presidente la Xunta Xeneral cobra más de 58.000 € añales. Los secretarios xenerales téunicos, direutores xenerales y altos cargos asimilaos cobren cuasi 58.000 € añales. Los cuatru miembros de la Mesa la Xunta Xeneral y los siete voceros parllamentarios cobren más de 54.000 € añales, a lo qu’hai d’añadir complementos, dietes y retribuciones n’especie.

El coste del aparatu de gobiernu n’Asturies (Gobiernu y Xunta Xeneral) ye descomanáu y, amás, xorrez d’añu n’añu en cantidaes sosprendentes, que nun s’axusten nin al índiz de xubía de la vida nin a la púdica austeridá que deberíen amosar comu sirviores públicos.

Tamos nun tiempu nel que medra’l númberu dirixentes que mantenemos y medren los sos sueldos. Pero ye que tamién tamos nuna dómina na que’l Gobiernu desatiende los sirvicios públicos básicos por falta presupuestu. Ehí tán los 40 asturianos que muerren ca mes ensin cobrar l’aída concedía a la dependencia. Ehí tán les llistes d’espera y la falta de profesionales na Sanidá público. Ehí ta la precariedá llaboral del profesoráu interín, más el 39% d’ellos (unos mil) sólo trabayará media xorná y con 800 € tienen de comer, pagar l’alquiler y la gasolina…. Y tantes otres necesidaes sociales básiques ensin atender de mou afayaízu.

La clas dirixente asturiana ca vegá ye más numberosa y ca vegá cobra más. Pero nin siquier foi quién a reconocer les múltiples trames de corrución nes que ta implicá (Villa, Riopedre, El Musel, Renedo, Niemeyer, fondos mineros, Pokemon, Aquagest, Montepío de la Minería, Telecable, La Camocha, financiación a UGT-CCOO…), nin a llevar ente la xusticia a munchos culpables, nin, por supuestu, a tornar los presupuestos públicos desapaecíos o malversaos.

Ente esta grave situación, Andecha Astur pide a Adrián Barbón que recorte la cadarma’l so gobiernu y que s’entamen les reformes llexisllatives necesaries pa recortar los sueldos de altos cargos del gobiernu y de los miembros de la Xunta Xeneral, asina comu qu’anicie una política de llucha decidía escontra la corrución. Y tamién pide que l’aforru llográu s’invierta na inversión social qu’Asturies tanto necesita pa superar les consecuencies de les polítiques d’esta mesma clas dirixente.

 

 

Deja un comentario

Tu dirección de correo electrónico no será publicada. Los campos obligatorios están marcados con *