Inicio > Asturies > ‘La Oficialidá sedrá un trunfu de la llucha popular’
AsturiesLlingua AsturianaPortada

‘La Oficialidá sedrá un trunfu de la llucha popular’

Mariano Suárez, militante hestóricu del movimientu de vindicación llingüística y voceru de la Estaya de Llingua d’Andecha Astur ye oxetu d’una entrevista n’Infoasturies.com na que valora la situación na que mos afayamos y damos les claves indispensables p’atalantar tol procesu.

Na entrevista Mariano Suárez fai un analís de lo que va suponer la ‘Oficialidá amable’  de la que desplica «ye tan llingüicidiu como la non oficialidá«, pon n’evidencia’l papel hestóricu del PSOE na represión llingüística «lo que se llogre nun podrá ser presentao comu una victoria democrática del PSOE y los sos sofitos. Porque son ellos mesmos los que tuvieron más de cuarenta años torgando los nuesos drechos llingüísticos.» y reivindica que si la oficialidá llega «va ser un trunfu consiguíu gracies a la llarga llucha popular».

Asina mesmo denuncia la esistencia d’una planificación resultáu de la negociación de la FSA-PSOE con IU, Podemos, con Foro y tamién «cola Academia de la Llingua Asturiana en tres aspeutos; primero sobro les llendes que pue algamar una supuesta oficialidá nos estremaos ámbetos de la normalización (enseñu, alministración, medios de comunicación…); en segundu llugar sobro la condición de la variante más ocidental del asturianu (la del Navia-Eo) nesta reforma; y en tercer llugar sol papel de l’ALLA nun nueu escenariu de supuesta oficialidá (nuees competencies, financiación…»).

Nesi sen entrúgase  «¿Por qué l’asturianu tien de ser la primer llingua del mundiu que tenga una oficialidá con axetivu calificativu? Pos porque “amable” fonciona equí comu un axetivu restrictivu de los niveles de proteición llegal de los falantes y, en consecuencia, llimitaor de les posibilidaes de pervivencia del asturianu comu llingua.» y dexa afitao que «les tres prohibiciones que se quieren caltener (n’enseñu, alministración y medios de comunicación) confirmaríen tres rialidaes que les compañeres d’Andecha Astur consideramos llamentables, antidemocrátiques, inasumibles…

  1. Al Pueblu Asturianu reconoceríense-y munchísmimos menos drechos qu’a los demás Pueblos del Estáu con llingua propio.
  2. Non sólo nun se garantizaría la pervivencia l’asturianu comu llingua, sinón que se taríen regulando les condiciones segures pa un llingüicidiu oficial a mediu plazu.
  3. Confirmaríase que los partíos españoles nun evolucionaron haza una posición de reconocimientu democráticu de drechos básicos de les asturianes y asturianos, sinón que sólo taríen poniendo’n marcha un nueu preséu llegal pa exercer la so asturfobia ñatural»

Concluyendo que: «Una oficialidá ensin que l’asturianu seya la llingua vehicular nel enseñu, la llingua de l’Alministración pública asturiana y la llingua de los medios de comunicación públicos del país nun ye oficialidá».

Na entrevista tamién trata del inventu d’una segunda llingua n’Asturies  «l’ALLA de los años 80 falaba de qu’Asturies tenía una sola llingua propia, l’asturianu. Y que, comu toles llingües, tenía dalgunes variantes a lo llargo’l so territoriu, que nomaben comu oriental, central, ocidental y la variante nos conceyos del Eo-Navia. L’ALLA tresmitía entós que del Navia al Eo había una variante del asturianu que se carauterizaba poles rellaciones de normal interferencia que se daben ente l’asturianu y el gallegu, lo mesmo qu’asocedía más allá del Eo, onde tamién el gallegu recibía les influyencies ñaturales del so normal contautu col asturianu; esto ye, les conocíes fales de transición» , faciendo un llamamientu a caltener la coherencia y nun permitir que la naguada Oficialidá mos faiga pasar por una oficialidá trampa, na que pa enriba xuncen cola galleguización del ocidente asturianu.

VER ENTREVISTA COMPLETA

2 thoughts on “‘La Oficialidá sedrá un trunfu de la llucha popular’

Deja una respuesta

Tu dirección de correo electrónico no será publicada. Los campos obligatorios están marcados con *