Dende Andecha Astur queremos escomenzar l’añu con un mensaxe xunitariu, positivu, pruyendo porque seya esti l’añu nel que toes/os llantemos los güeyos n’Asturies y sepamos poner en valor too aquello que mos xune y dexemos a un llau lo que pue separtamos.
Tenemos un país y un pueblu que precisa tol nuesu enfotu y que merez l’esfuerciu de trabayar de forma xunitaria -respetando ideoloxíes y sensibilidaes- p’avanzar nun procesu d’acumulación de fuercies que meyore la nuesa capacidá d’organización y rempuesta, y sobro too, qu’ufierte a la sociedá asturiana una ferramienta política cola que defender los sos drechos individuales y colleutivos.
Nunos intres nos que queda nidio non solo la inutilidá d’apostar por franquicies madrilanes n’Asturies, sinón tamién l’efeutu negativu que suponen p’avanzar na alternativa d’izquierda asturiana qu’Asturies precisa, faemos un llamamientu al conxuntu de la sociedá asturiana pa que ponga los güeyos n’Asturies y dexe de siguir dinámiques polítiques ayenes a la nuesa rialidá y les nueses necesidaes, apostando por un procesu integraor, xunitariu, respetuosu, realista, y sobro too: asturianu y d’izquierda, ensin dependencies nin sumisiones.
Ye tiempu d’Asturies, tiempu de nós ¡Agora Asturies!
