Inicio > Asturies > El trunfu’l soberanismu en Catalunya forciará una nuea transición nel Estáu
AsturiesInternacionalPortada

El trunfu’l soberanismu en Catalunya forciará una nuea transición nel Estáu

Ye inevitable que se reconoza la soberanía de los Pueblos y Andecha Astur lluchará pa qu’Asturies seya reconocía como suxetu activu con identidá propia

N’Andecha Astur cellebramos el trunfu soberanista y, especialmente, los bonos resultaos de los compañeros d’ERC y la CUP.

Pesia la represión, la manipulación informativo y les campañes mediátiques, el soberanismu catalán trunfó nestes elleiciones de manera indiscutible y eso supón que l’Estáu español, nun ye viable na conformación xurídico-política d’anguañu, viéndose abocáu a un nueu procesu de transición de magar de la reconocencia la soberanía de los Pueblos que conformen l’Estáu.

El réxime’l 78 ta caducu ya’l trunfu del soberanimsu empobínamos haza una nueva transición, qu’ esperamos qu’esta vuelta sí seya democrática, y na qu’Asturies nun pue tornar a quedar al marxe, sinón que –esi ye’l compromisu d’Andecha Astur- participará nellos con entidá propia.

Cuandu valoramos positivamente l’avance’l soberanismu catalán, sabemos que pue paecer contradictorio porque inclúi l’avance de dalgún partíu de dreches. N’Andecha Astur somos coscientes de la llucha de clas y la llucha de lliberación nacional son paraleles: la lliberación de los trabayaores ye la lliberación de les sos naciones y viceversa. En tou casu, hai que reconocer la conveniencia de que los sentimientos de lliberación nacional seyan compartíos tresversalmente por tola sociedá, tamién poles dreches, dalgo qu’a vegaes ye posible; mentantu qu’enxamás van compartir los oxetivos de lliberación de la clas trabayaora.

Agora mesmo’l PSOE alcuéntrense na disyuntiva de saber que tien de negociar una salía política al conflictu catalán, pero tamién qu’ello tendrá pal partíu ciertu coste’n militancia y votu. Si’l PSOE se resiste a exercer esi papel negociaor d’un nueu status xuridicu-políticu, tará dándo-y puxu a la estrema drecha (VOX), que podrá dir comiéndo-y al PSOE tarrén comu voceru principal del españolismu. Pero, si’l PSOE asume la responsabilidá que-y toca de coprotagonizar un procesu negociaor qu’igüe’l conflictu y algama un pautu, más o menos rápidu, col soberanismu catalán, afitaráse una solución política nun marcu nueu; eso permitirá cicatrizar un conflictu hestóricu y, a la llarga, esa nuea estabilidá dirá desactivando les posibilidaes de xorrecimientu del facismu, que quedará llendáu a una espresión testimonial.

Per otru llau, sabemos que’l PSOE, en situaciones de crisis estrema del españolismu, ye siempres el principal pegollu defensor d’esa identidá, apaeciendo comu’l so salvaor; esto ye asina de manera tala que’l PSOE, priorizando España perriba de cualisquier otru enfotu, llega siempres a trabayar en conivencia colos partíos de la más estrema drecha. Si’l PSOE tien una delda política con Catalunya, entá la tien muncho mayor con Asturies, onde-y regalaron a VOX un grupu parllamentariu y onde mos impuxeron el “Estatutu d’Autonomía” qu’entá güei carecemos y nun pudimos votar.

Dende Andecha Astur comprometémomos a continuar lluchando, man a man, col restu los Pueblos del Estáu pa que se dea la tan necesaria tresformación del mesmu. Y garantizamos la presencia activa d’Asturies nel procesu, de manera que se reconoza la voluntá soberana del Pueblu Trabayaor Asturianu. Pa ello siguiremos dando puxu a les coalliciones polítiques que tradicionalmente caltenemos colos partíos soberanistes de Catalunya, Euskal Herria, Galicia y otres partes del Estáu.

 

Deja un comentario

Tu dirección de correo electrónico no será publicada. Los campos obligatorios están marcados con *