Barbón quier domesticar la identidá asturiana

L’intentu de tresformar el 25 de mayu nel “Díi de la Bandera Asturiana” nun ye una anécdota simbólica nin una propuesta institucional inocente. Ye una operación política que busca desactivar una de les feches con mayor potencial emancipador na hestoria moderna d’Asturies. Y al frente d’esa maniobra ta’l presidente del ‘Principado’, Adrián Barbón.

El 25 mayu comemórase un fechu históricu d’enorme trescendencia: la constitución de la Xunta Xeneral en Xunta Suprema, y la declaración d’independencia de Asturies en nome de la Soberanía del Pueblu Asturianu. Asturies proclamóse soberana y actuó como nación, en nome propiu, como suxetu políticu. Foi un actu de soberanía popular, non una cellebración simbólica nin una fiesta institucional cualquiera.

Barbón, sicasí, quier vaciar esta fecha del so conteníu políticu y reducíla a una xornada d’esaltación estética de la bandera. El «Díi de la Bandera» ye, nesti contestu, una manera de neutralizar el calter reivindicativu del 25 mayu. En cuentes de reivindicar soberanía, propónmos axitar una bandera azul dende la neutralidá.

Esta táctica nun ye casual, nin nueva. Ye la mesma llóxica que vien aplicando na cuestión de la oficialidá del asturianu. Dempués d’años de discursos prometiendo avances, Barbón acabó xestionando’l procesu con mieu, calculadora en mano y cola voluntá de nun molestar. La oficialidá, prometida y llueu conxelada, convirtióse nun símbolu más d’esa política del «sí, pero non».

En dambos casos —la llingua y la soberanía— Barbón actúa como un xestor del desencantu. Ufre símbolos ensin sustancia, discursos ensin consecuencies, reformes ensin riesgu. Quier una identidá asturiana compatible col marcu autonómicu español, ensin rotures nin movilización. Un asturianismu de salón, servil, que nun incomode nin a Madrid nin al PSOE.

Camudar el Díi de la Soberanía pol Díi de la Bandera ye una forma de domesticar la memoria colectiva. Ye un llaváu simbólicu que evita falar de poder políticu, d’emancipación o de responsabilidá histórica. Y, como cola llingua, preséntase como una victoria, cuando en realidá ye una claudicación.

Los símbolos, si nun van acompañaos de conteníu políticu, camuden n’oxetos de consumu cultural. Una bandera que nun se ximielga pola soberanía nin acompaña la llucha del pueblu, ¿qué representa?

Frente a esta estratexa, ye más necesario que nunca reivindicar con claridá’l sentíu del 25 mayu: una fecha pa afirmar qu’Asturies foi —y pue volver ser— suxetu políticu. Non por señardá, sinón pa proyeutar un futuru con voz propia.

Apostar pol Díi de la Bandera ye una claudicación. Namás pue contentar a quien prefier simboloxía vacía a tresformación real. Si queremos una Asturies con voz propia, precisamos muncho más que xestos: precisamos memoria, concencia y voluntá política.

Barbón quier una Asturies orgullosa… pero callada. Con símbolos… pero ensin conteníu. Con historia… pero ensin soberanía. La nuesa responsabilidá ye evitar que esa operación tea ésitu.