Denunciamos que la Radiotelevisión del Principáu d’Asturies (RTPA), en manes del Gobiernu asturianu, sigue apostando pola marxinalización llingüística, al traviés d’una estratexa de folixa y maquillaxe qu’arrequexa l’usu del asturianu a programes sueltos y contenios folclóricos
Dende va años venimos denunciando la marxinalización del asturianu por parte de la Radiotelevisión del Principáu d’Asturies (RTPA). Ello ye responsabilidá de la dirección del ente, pero sobre tou, de la Xunta Xeneral, que vien de votar mayoritariamente a favor de la oficialidá del asturianu pero que, sicasí, redacta un mandatu marcu —documentu que marca les llinies estratéxiques y funcionales del ente públicu— pal serviciu públicu de radio televisión que namás pue calificase de risible no que cinca a normalización llingüística.
La RTPA, como mediu públicu que ye, tien que ser una televisión pública al serviciu del país, y eso implica respetar y defender la cultura y la llingua asturianos, que tienen de tar presentes, visibles y normalizaes.
Per contra, el borrador de mandatu marcu de RTPA, propuestu pola Xunta y pendiente de ratificación sigue calteniendo arrequexáu l’usu del asturianu, tratándolo como un idioma secundariu y residual y consagrando la discriminación d’esti mediu contra los asturfalantes al negar drechu a que’l so idioma tea con dignidá y normalidá nes pantalles d’Asturies.
Per otru llau, esti borrador incumple la Llei d’Usu, que recueye nel so artículu 13 que ‘nes emisiones de radio y televisión y nos demás medios de comunicación con presencia actual o futura de la Administración autonómica, ésta velará por una presencia adecuada del asturianu’.
Nun hai normalización llingüística ensin presencia real nos medios de comunicación; la influyencia de los medios de comunicación na normalización d’una llingua, especialmente cara a la reciella y la tresmisión interxeneracional, ye innegable.
Poro,desiximos:
- Que l’asturianu seya llingua vehicular na RTPA, con presencia diaria y normalizada en tolos formatos, horarios y conteníos.
- Que se garantice l’usu d’un asturianu de calidá, evitándose l’amiestáu ya’l consiguiente fomentu de la disglosia.
- La revisión inmediata del mandatu marcu pa incluir compromisos firmes y cuantificables col usu del asturianu.
- Que se dote de recursos humanos y técnicos específicos pa la producción y emisión en llingua asturiana.
- Que se garantice l’usu del asturianu en toles secciones de la web, redes sociales y comunicación institucional del ente.
Aporfiamos en qu’esti documentu ye un borrador, pendiente d’aprebal pel Plenu y que poro entá ye susceptible d’aplicar estes modificaciones anantes de que se blinde la discriminación por otros nueve años.
