Andecha Astur denuncia públicamente la persistencia del peaxe del Güerna como un exemplu de discriminación territorial, espoliu económicu y subordinación política que vien careciendo Asturies dende hai más de cuatro décades. El postrer dictame emitíu pola Comisión Europea, que da un ultimatum al Estáu español pa desaniciar la prórroga de la concesión, vien a confirmar lo que llevamos años denunciando: el peaxe del Güerna ye illegal, inmoral ya inxustu pa la ciudadanía asturiana.
Una prórroga ilegal y encubierta
En xunetu de 2025, la Comisión Europea emitió un dictamen motiváu nel que considera que la prórroga de la concesión d’esplotación de l’AP‑66, acordada pol Gobiernu español l’añu 2000, vulnera la normativa europea de contratación pública y competencia. La UE califica esta prórroga como una «modificación sustancial del contratu, equivalente a una nueva alxudicación», tramitada ensin concursu públicu, ensin publicidá y ensin respetar los principios de tratamientu igualitariu y transparencia que esixe’l derechu comunutariu.
Europa da agora un plazu de dos meses –fasta’l 17 de setiembre de 2025– pa que l’Alministración española corrixa la situación. De nun facelo, llevará’l casu al Tribunal de Xusticia de la Unión Europea, lo que podría derivar en sanciones económiques pal Estáu.
Una denuncia que partió d’Asturies
Esta resolución de la Comisión Europea responde a una denuncia presentada nel añu 2021 pol entós diputáu asturianu Daniel Ripa, que calificó la decisión como una “victoria irreversible” pal pueblu asturianu. Dende Andecha Astur valoramos positivamente esta iniciativa y reconocemos que la presión social, institucional y política dende Asturies ye la que forzó a la XE a intervenir.
Un espoliu económicu y un frenu al futuru d’Asturies
L’AP‑66 ye la única vía d’alta capacidá que comunica Asturies cola Meseta y una infraestructura esencial pal tráficu comercial, profesional y personal. El peaxe nun solo supón un sobrocostu intolerable pa miles d’usuarios diarios, sinón qu’actúa como barrera al desendolcu económicu, l’actividá empresarial y la vertebración territorial del país.
Mentanto, en delles otres comunidaes autónomes, los peaxes fueron esaniciaos o asumíos pola alministración pública. P’Asturies, el silenciu, l’abandonu y la discriminación estructural.
Andecha Astur desixe:
- La supresión inmediata y definitiva del peaxe del Güerna, en cumplimientu del dictame européu.
- La depuración de responsabilidaes polítiques y xurídiques sobro la concesión y prórroga illegal.
- Una compensación económica a la ciudadanía asturiana, polos más de 40 años de cobros abusivos.
- Un plan estatal d’inversión n’infraestructures pa Asturies, con garantía de vertebración y accesibilidá.
- La coordinación institucional asturiana pa garantizar qu’esta sentencia se cumpla y que nun hebia más impunidá.
- La movilización del pueblu asturianu, pa defender el nuesu drechu a una comunicación xusta, digna y ensin peaxes.
Non más sumisión: agora ye’l momentu
El peaxe del Güerna ye más que un robu: ye’l símbolu d’una rellación desigual, d’una falta de respetu y d’un modelu territorial qu’asfixia a Asturies. Agora, cola Xunión Europoea dándomos la razón, ye’l momentu d’actuar con firmeza, dignidá y determín.
Andecha Astur nun va achantar.
El peaxe del Güerna tien que ser historia.
¡Asturies nun paga más sumisión!
