Inicio > Asturies > La República Asturiana garra fuercia en Tarna
Asturies

La República Asturiana garra fuercia en Tarna

L’actu de comemoración de la Declaración d’Independencia del Conseyu Soberanu d’Asturies y Llión sirvió pa vindicar la República Asturiana como apueste de futuru.

VER SEMEYES

L’ascensu a les trincheres de L’Abidular a primera hora de la mañana, la visita a la casamata defensiva de Tarna, l’homenaxe floral y la intervención política marcaron una xornada reivindicativa na que tamién hebio una importante presencia llionesa.

La Maginot Cantábrica, les trincheres defensives de la cordillera asturiana na que demientres 16 meses consiguieron aparar l’exércitu franquista, foron l’oxetu primeru d’esta xornada d’homenaxe y reivindicación. Ascendiendo a los más de 1.800 metros,  comprobóse in situ lo heroico de la resistenciademientres la Guerra Civil nunes condiciones tan dures, dempués, la visita a la casamata de Tarna, como parte del sistema defensivu qu’impidió’l pasu al exércitu facista, y darréu l’homenaxe floral nel monumentu asistiáu na llende d’Asturies y Llión,nel que como vien siendo avezao, acudieron llioneses a recordar lo que tamién ye parte de la so hestoria.

Na intervención política de Marcos Fernández, recordáronse los fechos hestóricos que s’homenaxeaben, pero tamién y l’esfuerciu heroicu d’un exércitu y un Pueblu, que como afirmó «nun yeren seres estraordinarios, yeren los nuesos güelos y güeles, fueren ellos los que dieron esti exemplu de compromisu y llucha. Pudieron facelo porque nellos alendaba un proyeutu de cambiu social, anarquista, comunista, socialista, o cenciellamente de xusticia social. Teníen un proyeutu y cuando’l Conseyu Soberanu se declaró independiente tamién tovieren un territoriu, una patria que defender. D’ende la so fuercia, per ende’l so heroismu».

Nesi sen afirmó «nós somos los nietos y bisnietos d’aquellos homes y muyeres, y como ellos tamién tenemos un proyeutu de recostruición nacional y social, y como ellos, sabremos tar al altor de les circustancies y avanzar nesa República Asturiana que seya garantía de democracia, de respetu a los drechos individuales y colleutivos, y l’apueste de futuru d’esti país d’homes y muyeres llibres, d’un pueblu soberanu del que formamos parte y qu’alita ente nós».

Notru sen, tornó a denunciase al silenciamientu de la nuesa hestoria, a la indignidá que supón que los partíos políticos que llevaron a Asturies a lo cimero na evolución social y na custión nacional, son agora títeres de Madrid que s’avergoñen d’Asturies y de la so hestoria, ensin más proyeutu qu’obedecer a lo que-yos manden ya intentar medrar.

Ello asina, recordóse la so responsabilidá na falsa transición del franquismu a la monarquía borbónica y como nel casu d’Asturies y Llión, a diferencia del restu de naciones del Estáu, en cuenta de recuperar la istitución política previa al franquismu que mos representaba, el Conseyu Soberanu, impunxéronmos ensin dexamos votalu, un estatutu y un «Principado» ensin denguna base social, que nun va acullá d’una cenciella descentralización alministrativa. Nel casu de Llión, empeoráronlo aniciando una nueva  comunidá, la de Castilla y León, na que los integraron ensin dengún sofitu nin tradición hestórica.

Pa finar, perafitóse la reclamación de la República Asturiana como una continuidá hestórica d’aquella declaración de 1937 y tamién y sobro too, como unúnicu sistema que garantiza la llibertá, democracia y progresu d’esti pueblu. Nel mesmu sen, llamóse a la participación na movilización del Díi de la Nación Asturiana escontra la presencia de la monarquía española en Cuadonga, perafitando que «¡Asturies nun tien rei!».

One thought on “La República Asturiana garra fuercia en Tarna

Deja una respuesta

Tu dirección de correo electrónico no será publicada. Los campos obligatorios están marcados con *