Dende Andecha Astur queremos amosar públicamente’l nuesu sofitu a la denuncia presentada polos collectivos ecoloxistes d’Asturies, en particular pola Coordinadora Ecoloxista d’Asturies, que vienen alertando del usu de coníferes foránies, altamente pirolítiques y ayenes a los ecosistemes propios del país, nes repoblaciones forestales que tan llevándose a cabu en montes públicos del conceyu Tinéu.
Falamos de montes como La Cabada, L.laguero, Siel.la y Cobertoria, espacios de gran valor ambiental y social, que dempués de sufrir incendios forestales tan siendo repoblaos con especies como’l pinu mariellu (Pinus taeda) o’l cedru xaponés (Cryptomeria japonica), árboles d’orixe foriatu, escoyíos con criterios productivistes y de xorrecimientu rápidu, pero inaceutables dende’l puntu de vista ecolóxicu y del riesgu d’incendios.
Esta política forestal, impulsada dende la Conseyería de Mediu Rural y Política Agraria del ‘Principado’, supón un grave pasu atrás na protección del mediu natural asturianu. Nun se pue falar de recuperación de montes quemaos cuando se sustitúin ecosistemes diversos por llantaciones monoespecífiques, empobrecíes y altamente vulnerables al fueu, que repiten los mesmos erros que yá conocemos d’otres partes del país.
Les coníferes foránies que se tán usando:
- Aumenten de mou significativu’l riesgu d’incendiu, pola so elevada inflamabilidá y acumulación de biomasa seca.
- Emprobecen el suelu, alterando la so composición y dificultando la rexeneración natural d’especies autóctones.
- Afayen mal cola fauna llocal, al nun crear hábitats diversos nin compatibles colos ciclos naturales del monte asturianu.
- Inhiben la biodiversidá, favoreciendo espacios forestales artificiosos, ensin resiliencia frente al cambéu climáticu.
Resulta especialmente grave qu’estes actuaciones nun cuenten con informes públicos d’impautu ambiental, nin con procesos de participación social nin consulta a colleutivos ecolocistes, xente del monte o comunidaes rurales afeutaes. Amás, el Plan Forestal del ‘Principado’ d’Asturies vixente nun contempla l’usu d’estes especies foránies, polo que tamos ante una actuación cuestionable dende’l puntu de vista llegal y planificador.
Dende Andecha Astur queremos dexar claro que defender los montes nun ye namás una cuestión ambiental, sinón tamién una cuestión de soberanía, xusticia territorial y dignidá rural. Los montes d’Asturies nun puen siguir siendo trataos como zones d’esperimentación forestal al serviciu d’intereses empresariales o productivistes, mentanto se desprecia’l conocimientu tradicional y científicu acumuláu nel país.
Por too ello, exiximos:
- La paralización inmediata de les repoblaciones con coníferes foránies en montes públicos de Tinéu y del restu d’Asturies.
- La revisión integral de los planes de repoblación forestal, con criterios científicos, ecolóxicos y adaptaos al cambéu climáticu.
- La prioridá absoluta pa la rexeneración natural y la llantación d’especies autóctones, como carbayos, castañaless, bidules o fayes, que creen montes diversos, vivos y resistentes.
- La participación real de la sociedá civil, colleutivos ecoloxistes y comunidaes rurales na planificación y xestión forestal.
- El cumplimientu estrictu del Plan Forestal d’Asturies y la so actualización democrática, afayada a la realidá actual del país.
Asturies precisa montes vivos, non plantaciones industriales. Necesita polítiques forestales que protexan la biodiversidá, reduzan el riesgu d’incendios y xeneren futuru pal mediu rural, non que reproduzan modelos fracasaos que solo traen más fueu, más despoblación y más destrucción del paisaxe.
Los montes d’Asturies son padremuñu común del pueblu asturianu.
Defendelos ye defender el futuru del país.
