Esti domingo 17 d’agostu, Andecha Astur rendirá homenaje a la Declaración de Soberanía proclamada pol Conseyu d’Asturies y Llión en 1937, un acontecimientu que supunxo la independencia de fechu y drechu frente a la República Española.
El 24 d’agostu de 1937, el pueblu asturianu declaraba la Soberanía del Conseyu d’Asturies y Llión, independizándose de la República Española y proclamándose Conseyu Soberanu d’Asturies y Llión, iniciando un procesu históricu que tuvo repercusión internacional. Esta institución asumió toles funciones de gobiernu y enfrentóse, en solitariu, al exércitu franquista y a les fuercies alemanes e italianes que lu sofitaben.
Sicasí, la propia República Española, en vez de respaldar la resistencia antifascista asturiana, priorizó la “unidá d’España”, llegando a pedir la rendición del Conseyu y a ver como un “aliviu” la ocupación d’Asturies pol exércitu facista.
L’actu conmemorativu d’Andecha Astur tendrá llugar nel Puertu Tarna. La xornada escomenzará a les 10:00 h cola xubía a les trincheres de L’Abidular – Filispardi, y a les 13:30 h cellebrarase l’homenaxe principal xunto al monumentu que recuerda esta declaración, última gran institución democrática escoyía pol pueblu asturianu .
La proclamación soberanista de 1937, recoyida nel so artículu primeru, establecía:
«El Conseyu Interprovincial d’Asturies y Llión, de magar la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdicción y a elli queden dafechamente sometíes toles xurisdicciones y organismos civiles y militares que funcionen o vaigan funcionar dientru’l mentáu territoriu.»
Con esta decisión, Asturies impulsó un auténticu procesu revolucionariu y defendióse heróicamente del embiste facista español, italianu y alemán. El presidente del Conseyu, Belarmino Tomás, llegó a solicitar a la Sociedá de Naciones el reconocimientu internacional d’Asturies como nación independiente.
La llamada “Transición” que siguió al franquismu tampoco nun restituyó esta institución d’autogobiernu. A la escontra, impúnxosemos dende Madrid, ensin consultes al pueblu asturianu, la fórmula d’un “Principado” y un Estatutu autonómicu histórica y socialmente ayenu, qu’ensiquiera nun reconoz principios democráticos tan básicos como la oficialidá de la nuesa llingua nacional, y que perpetua una situación de colonialismu inaceutable.
