El Conceyu Estraordinariu valora positivamente’l pasu de Somos Asturies a un marcu políticu propiu asturianu y crea una Estaya de Trabayu Elleutoral pa dar puxu a un frente común de la izquierda asturiana mentes va preparando candidatures
Andecha Astur cellebró esti 8 de setiembre, nel Díi de la Nación Asturiana, un Conceyu Estraordinariu nel que s’analizó’l nuevu escenariu políticu asturianu y fixáronse les llinies de trabayu de la organización de cara a los prósimos meses y a les prósimes convocatories elleutorales.
Ente los alcuerdos adoptaos, el Conceyu Estraordinariu quixo saludar l’aniciu de Somos Asturies y valorar especialmente’l cambéu políticu que supón que persones y sectores que veníen actuando dientro d’un espaciu con referencia y dependencia estatal opten agora por constituyir una fuerza política que declara Asturies como’l so marcu específicu d’actuación.
P’Andecha Astur esti nun ye un cambéu menor. L’abandonu de la llóxica pola que la política asturiana queda subordinada a organizaciones y decisiones d’ámbetu estatal, y l’asunción d’Asturies como espaciu propiu de decisión y actuación política, ye un avance que valoramos positivamente.
Ye precisamente esi cambéu de marcu’l que fai posible abrir una nueva rellación política. Andecha Astur entiende que les diferencies ideolóxiques o de trayeutoria nun tienen d’impedir la collaboración cuando esiste una voluntá compartida de construyir alternatives dende Asturies y pa Asturies.
Esta posición ye coherente cola llinia qu’Andecha Astur vien defendiendo dende hai años: priorizar la construcción d’un frente común asturianu frente a la subordinación a les dinámiques polítiques estatales.
Nesi sen, Andecha Astur fai un llamamientu a que Somos Asturies y el restu de fuercies de la izquierda asturiana asuman los principios básicos de la unidá d’aición, como vía pa superar la fragmentación actual y ufiertar a la sociedá asturiana una alternativa política con capacidá real d’intervención.
Una unidá que respete la pluralidá
Andecha Astur defende como estratexa política la unidá d’aición de la izquierda asturiana.
Esta propuesta nun pasa pola disolución de les organizaciones existentes nin pol aniciu d’una estructura uniforme. Pasa pola construcción d’un espaciu compartíu, nel que se respete la independencia, l’autonomía y les distintes cultures polítiques y sensibilidaes de cada fuerza.
L’oxetivu ye superar una fragmentación que debilita la capacidá d’intervención de la izquierda asturiana y poner en común aquello que permita actuar de manera coordinada.
Nun se trata de borrar diferencies, sinón de facer posible que les diferencies nun impidan actuar xuntos nos oxetivos nacionales y sociales compartíos.
Esta cooperación tien de ser quien a ufiertar a la sociedá asturiana una alternativa política reconocible, con garantíes de representación y capacidá efeutiva pa intervenir tanto nes instituciones como nos conflictos sociales.
Andecha Astur entiende que la pluralidá nun tien por qué ser un impedimentu pa la collaboración. La existencia de cultures polítiques distintes pue convivir con alcuerdos sobro oxetivos nacionales y sociales compartíos, siempre que se respete l’autonomía de cada organización y que les decisiones que conciernen a Asturies se tomen n’Asturies.
Nesta cuestión ta una de les diferencies esenciales ente una alternativa política asturiana y la simple tresllación a Asturies de decisiones, estratexes y candidatures diseñaes dende organizaciones estatales.
La propuesta tampoco ye nueva. Andecha Astur yá defendió públicamente la creación d’un Frente Común Asturianu y de fórmules de participación que respetaren la independencia de les distintes sensibilidaes.
La unidá que defendemos, poro, nun tien de ser namás elleutoral o coyuntural. Apostamos por una coordinación estable de la izquierda asturiana, capaz de combinar soberanía, tresformación social y eficacia política.
Una Estaya de Trabayu Elleutoral p’avanzar nel frente común
Nesi sen, el Conceyu Estraordinariu alcordó constituyir una Estaya de Trabayu Elleutoral, con un doble oxetivu.
Per una parte, va establecer pontes de comunicación col restu de fuercies que tienen Asturies como marcu específicu d’actuación, col oxetu d’avanzar nel diálogu y na construcción d’esi frente común de la izquierda asturiana.
La nueva situación creada pola constitución de Somos Asturies abre, nesti sen, posibilidaes que nun esistíen de la mesma manera cuando esti espaciu políticu tenía la so referencia nuna organización estatal. Andecha Astur considera que ye’l momentu d’esplorar estes posibilidaes con voluntá d’alcuerdu, ensin que ello suponga rebaxar les posiciones polítiques propies nin la necesidá d’un marcu de decisión asturianu.
Per otra parte, la Estaya va entamar a ellaborar tanto los conteníos políticos como les candidatures nacionales y de conceyu de cara a les prósimes elleiciones.
El trabayu d’esta Estaya tendrá como oxetivu facilitar la posible integración d’estos conteníos y candidatures nun proyeutu conxuntu, nel casu de que se dean les condiciones polítiques pa ello.
Andecha Astur llega, poro, a esti procesu con una voluntá clara d’alcuerdu, pero ensin renunciar a la so autonomía política nin a garantizar la presencia d’una alternativa nacionaliega d’izquierda nes urnes.
Si finalmente nun fuera posible algamar esi alcuerdu, tendrá de garantizase la existencia de candidatures d’izquierda nacionaliega que defendan claramente los principios de soberanía nacional, tresformación y progresu social.
Ye una posición coherente cola esperiencia anterior de la organización, que yá defendiera la necesidá d’un frente ampliu ente organizaciones asturianes d’izquierda y optara por presentar candidatures propies cuando esi alcuerdu nun foi posible.
D’esta miente, Andecha Astur entama’l trabayu políticu y organizativu necesariu pa encarar les prósimes elleiciones con una propuesta propia y, al mesmu tiempu, cola voluntá d’avanzar na construcción d’una candidatura y un espaciu común de la izquierda asturiana.
Andecha Mocedá, una prioridá pa la organización
Otru de los aspeutos perimportantes trataos nel Conceyu Estraordinariu foi l’espoxigue d’Andecha Mocedá y la necesidá d’afayar la estructura organizativa d’Andecha Astur a esta estaya de la sociedá.
El Conceyu alcordó avanzar nel afayamientu organizativu necesariu p’afayase a esti xorrecimientu y na ellaboración d’una llinia d’actuación específica pa la mocedá asturiana, que dea rempuesta a les sos necesidaes ya intereses.
Esta llinia tendrá de garantizar l’autonomía d’Andecha Mocedá dientro d’Andecha Astur, al empar que los sos representantes s’integren na estructura de la organización y participen na definición de les polítiques que-yos afeuten más direutamente.
L’oxetivu ye que’l xorrecimientu de la organización moza se traduza tamién nuna mayor capacidá d’intervención política ente una xeneración especialmente afeutada pola precariedá, les dificultaes d’accesu a la vivienda y la emigración forciada.
Andecha Astur considera fundamental reforzar l’organización de la mocedá y dotala de los espacios necesarios pa desendolcar la so propia actividá política, dientro del marcu común de la organización.
