El Conceyu nacional d’Andecha Astur aprebó caltener la propuesta de Frente Común y llistes abiertes en candidatures onde poder integrase de forma independiente
El Conceyu Nacional d’Andecha Astur cellebráu esti 18 marzu alcordó caltener la propuesta de Frente Común Asturianu, nel entendimientu que nes actuales circustancies la propuesta tien más xacíu que nunca. Y ello porque tamos comencíos de que namás ye posible avanzar xunciendo fuercies ente les presones y organizaciones que creyemos que les asturianes y asturianos tenemos drechu a decidir cuanto afeuta al nuesu futuru, y que defendemos una necesaria tresformación social imparable que garantice la reconcencia los nuesos drechos y llibertaes presonales y colleutives.
Ello asina, aprobóse aniciar un procesu de llistes abiertes, un procesu que permita participar nes candidatures presentaes por Andecha Astur, a presones independientes, qu’ensin necesidá de pertenecer a la organización compartan la necesidá d’avanzar nun Frente Común nel que xuncir fuercies toles asturianes/os deseyosos d’algamar una Asturies de progresu, igualitaria y con capacidá pa planificar el so futuru.
Nel mesmu sen, Andecha Astur garantiza la posibilidá de consensuar los programes elleutorales y dar prioridá a les presones con más capacidá integraora, ensin tener en consideranza la so militancia o non d’éstes na organización, dándose plena soberanía a los conceyos pa la ellaboración de les sos llistes, y dellegando na Xunta Executiva l’aprebación de les candidatures nacionales.
Col oxetu de llevar allantre estos alcuerdos costituyóse formalmente una Estaya Elleutoral qu’entamará’l so llabor de forma inmediato.
Per otru llau, ente los munchos alcuerdos algamaos nel Conceyu Nacional, valoróse especialmente la necesidá d’afayar más el discursu a les rialidaes cercanes de la ciudadanía y la clas trabayaora, xunciendo la problemática inmediata cola visión nacional y de tresformación social, dando más puxu a los ellementos proposivivos frente a los críticos-reactivos.
Nel mesmu sen valoróse de forma perpositiva’l trabayu que se vien faciendo de participar activamente nos estremaos movimientos sociales y nes rempuestes a los conflictos llaborales, asina comu la necesidá d’afondar na dinámica de cai, como métodu de dinamización social y de superar la invisibilización mediática que carecemos.
Asina mesmo, nel Conceyu Nacional tratóse fondamente la situación de la mocedá asturiana, que ye víctima de les polítiques con que l’Estáu español redefine’l papel xeoestratéxicu d’Asturies nel contestu de la reordenación de territorios y mercaos nel Estáu y n’Europa. Consecuencia d’ello, les polítiques estatales siguen interesaes en forciar a la nuesa mocedá a emigrar, sobro too nel mundiu rural de les fasteres oriental y ocidental asturiana, desdexaos dafechu pol Gobiernu y despoblaes pol acosu de polítiques agresives de reordenación y esplotación territorial (llendes a la forma de vida tradicional, torgues a l’agricultura y ganadería, parques eólicos terrestres y marinos, monocultivu ocalital, turismu masificáu ya invasivu…) . Énte la gravedá d’esti problema, el Conceyu Nacional aprebó un marcu estratéxicu d’alternatives que se va incorporar al programa elleutoral.
One thought on “Frente Común y llistes abiertes”