Inicio > Asturies > Manifestamientu antitaurín
AsturiesConceyosMás noticiesPortada

Manifestamientu antitaurín

Andecha Astur llama a participar esti domingu 18 d’Agostu a les 16:30 en Xixón nel manifestamientu escontra la tortura pública d’animales entamáu por ANADEL y sofitáu por más de 40 asociaciones, posicionándose dafechu a la escontra del maltratu animal, ainda más cuando se torna n’espeutáculu y pretende amarutase comu arte.

La insistencia del conceyu Xixón de caltener vivu cola so collaboración esti vezu xabaz, a la escontra de la manifiesta voluntá del pueblu xixonés y asturianu, de les sos tradiciones, del xacíu y de la más fundamental sensibilidá pa colos seres vivos nun pue pescanciase si nun ye pol envís de forciar una apariencia d’españolidá artificial dafechu,

Xuncímosmos tamién a la solicitú de que se prohíba la entrada de menores al espeutáculu, remembrando que’l Comité de los Drechos del Neñu y la Organización de les Naciones Xuníes, pronúnciárense de forma espreso ala escontra de que la reciella participe y asista a eventos taurinos.

Denunciamos qu’esta cellebración sedría  imposible ensin la collaboración indispensable del Ayuntamientu Xixón pal so caltenimientu, faciéndolos cómplices d’esta obscena amuesa de violencia de baldre, marafundiu económicu y aculturación españolista, yá que la tortura y muerte de toros convertía n’espeutáculu públicu va escontra la sensibilidá y la cultura asturiana, y el so caltenimientu n’Asturies nun tien otru enfotu que la invasión cultural y la españolización pol aciu de perafitar pela fuercia una de les más xabaces espresiones de lo “español” nel nuesu país. La tortura animal nun forma parte de la tradición asturiana.

Nesi sen convida al conceyu de Xixón a desaniciar dafechu la Feria Taurina de Begoña, esborriando con ello’l caberu ñiciu d’esta barbarie n’Asturies, aplicando les midíes llegales afayaices y dexando de collabotar económica y publicitariamente colos eventos taurinos en Xixón, darréu que’l so ruin sofitu popular faila económicamente inviable por sigo mesma.

Ye más, Andecha Astur convídalu a lliderar la desixencia al «Principado» d’una modificación de la llei escontra’l maltratu animal qu’incluya a los toros na proteición de la que tolos animales esfruten, de magar va dos años, cola Llei d’Espeutáculos públicos y Actividaes d’Arruelu, que prohibe esplicitamente utilizar nos espeutáculos animales xabaces de cualisquier triba, recoyendo asina la demanda de la población d’evitar a los animales sofrimientos evitables ya inxustificaos y torgando los espeutáculos qu’impliquen crueldá o maltratu pa los animales, pero permitiendo al tiempu -per agora- esta espresión españolista de crueldá.

Deja un comentario

Tu dirección de correo electrónico no será publicada. Los campos obligatorios están marcados con *