L’Alcaldesa Xixón siguirá regalando 45.000 € añales a la familia Borbón

Andecha Astur convida a IU/Podemos a alloñase d’esi activismu monárquicu y a l’alcaldesa a reconvertise en patrona de la Fundación Princesa

    Con motivu la entrega premios que la Fundación Princesa fexo hai unes feches nel Hotel Reconquista, Andecha Astur presentó una batería d’iniciatives polítiques pa dar acabu a les sovenciones públiques que recibe esa axencia publicitaria de la familia Borbón.

El diputáu nel Congresu Oskar Matute (de la nuesa coalición “Agora Repúbiques”) presentó a propuesta d’Andecha Astur una entruga al Gobiernu español PSOE-Podemos sol dineru qu’añalmente regala a la Fundación Princesa (3000.000 €/añu). Y Andecha Astur presentó pidíos na Xunta Xeneral y nes Cases Conceyu d’Uviéu, Xixón y Avilés pa que den acabu tamién a eses sovenciones que regalen.

Bien poco entardó l’alcaldesa de Xixón, Ana González, en destapase comu la presidenta in pectore del clú de fans de la familia Borbón na ciudá.

Andecha Astur denunció que’l gobiernu municipal entregó 270.000 € a la Fundación Princesa ente los años 2014 y 2019, a razón de 45.000 €/añu. Y señalaba la impudicia política que representa una Casa Conceyu (de supuesta mayoría socialista y republicana) entregá de pies y manes a un sistema monárquicu, foriatu y corrutu, al que-y regalen presupuestos públicos arrampuñaos a la clas trabayaora asturiana per aciu los impuestos que deberíen dedicase a sirvicios públicos básicos. Más entá, cuandu les clases populares y trabayaores de toles naciones del Estáu yá se ven obligaes, al traviés de los Presupuestos Xenerales del Estáu, a pagar añalmente 7.887.150,00 € pa caltener la Familia Rial de los Borbón y la Casa del ciudadanu Felipe VI.

Pos paez que nun-y sentó ná bien a l’alcaldesa Xixón la denuncia y el pidíu que presentó Andecha Astur. A los pocos díes, recibimos esti escritu dende alcaldia@gijon.es y firmáu por Ana González (reproducímoslu nel únicu idioma que’l PSOE considera oficial):

Respecto a su proposición de llevar a debate plenario la retirada de la aportación de este Ayuntamiento a la Fundación Princesa de Asturias, fijada por el convenio en vigor entre ambas partes, le comunico que no entra en las previsiones de este Equipo de Gobierno plantear dicha medida.

 Con independencia de las consideraciones políticas en que fundamenta su petición, los Premios Princesa de Asturias constituyen un activo cultural y social de primer orden para esta región, no solo en términos de proyección nacional e internacional, sino sobre todo de promoción y divulgación de unos valores de excelencia ejemplares en distintas disciplinas y áreas de conocimiento y actividad, como lo acredita su muy diverso elenco de personas e instituciones premiadas.

 Por otra parte, las actividades públicas que los galardonados y galardonadas desarrollan a lo largo de la Semana de los Premios en diversos puntos de Asturias constituye una de las más interesantes y enriquecedoras actividades del año, y acerca a toda la ciudadanía asturiana una programación cultural, científica y artística de primer orden.

 Reciba un cordial saludo,

 Ana González Rodríguez

Alcaldesa Gijón

Éstes son les míseres razones d’una Casa Conseyu que nos caberos seyes años entregó 270.000€ a los Borbones. Esto ye, el regalu que fizo a Leonor dexó a 3.375 families xixoneses ensin aídes municipales pa material escolar n’Educación Infantil. O dexó a 5.400 families ensin aídes municipales pa material escolar n’Educación Primaria. O dexó a 771 families ensin aídes sociales al consumu enerxéticu.

Pero pa tapecer esi trevase de fondos públicos al sirviciu la monarquía española, l’alcaldesa Xixón anecia en ñegar lo que tol mundiu sabe: que la Fundación Princesa ye’l preséu de la corona española pal desenrollu la so política de propaganda. Na publicidá qu’esparde esa socialdemocracia lliberal y española que representa’l PSOE, la Fundación de la familia Borbón ye un prototipu de “valores exemplares d’escelencia” y “una rialidá cultural, científica y artística de primer orde”.

De toles maneres nun ye la primer vegá que l’alcaldesa del PSOE en Xixón miente pa defender la monarquía española. Hai meses qu’anunció públicamente que la Casa Conceyu diba retirar el nome de l’Avenía Rei Juan Carlos I, un determín motiváu pola trayeutoria delictiva y vergoñosa de la corona nos caberos tiempos, por un pidíu oficial que-y fizo Andecha Astur y pola presión social pa dinificar les cais de Xixón. Sicasí, Ana González mintió: el tiempu pasa y ella nun tomó entá denguna iniciativa pa camudar el nome d’esa avenía borbónica.

A la vista de too ello, Andecha Astur convita al restu la esquierda española (IU, Podemos) a caltenese lloñe d’esi activismu monárquicu tan tósicu que caltién el PSOE. Y, sobro too, convita a l’alcaldesa a renunciar a les sos fonciones si ye que sigue prefiriendo regalar a los Borbón 45.000 € ca añu enantes que meyorar les ruines polítiques sociales de la Casa Conceyu que preside. Quiciás tenga más vocación de patrona de la Fundación Princesa que d’alcaldesa d’una ciudá de trabayaores asturianos.