La delirante carta’l Comisariu Européu d’Emplegu y Drechos Sociales, llográ por EH Bildu, confirma la complicidá del Gobiernu español y Adrián Barvón nun nueu procesu de desindustrialización n’Asturies y amuesa que sólo la llucha obrera y social pue asegurar el futuru d’Arcelor Mittal que-y pruye a Asturies
L’eurodiputáu Pernando Barrena, d’EH Bildu, socios d’Andecha Astur na coallición Agora Repúbliques, acaba recibir retruque de la Comisión Europea a les entrugues presentaes por Andecha Astur sobro la reconversión d’Arcelor Mittal n’Asturies. La carta róblala Nicolas Schmit, Comisariu Européu d’Emplegu y Drechos Sociales y, curiosamente, miembru’l Partíu Socialista Obreru de Luxemburgu.
A la custión de si la Comisión Europea afalará la estabilidá territorial d’empreses que, comu Arcelor Mittal, reciben aídes europees, el Comisariu arrespuende que defende, enantes que ná, la llibertá de movimientu’l capital y que, en tou casu, la responsabilidá de controlar la reconversión o desllocalización d’Arcelor Mittal ye únicamente del gobiernu español PSOE-Unidas Podemos. La Comisión namái pidi que les empreses en reconversión o desllocalización caltengan informaos a los trabayaores.
Cuandu Andecha Astur entruga si la Comisión va tomar dalguna midía pa torgar qu’Arcelor Mittal suprima 1000 puestos de trabayu, aquella dexa ver que nun fadrá un res por caltener esos puestos. Sólo ufriría a Asturies les midíes paliatives que’l capitalismu européu aplica nos territorios desindustrializaos. El Comisariu reconoz que permitiría qu’Arcelor Mittal dispida a los sos trabayaores, pa dempués facer por acallentalos con aídes del Fondu Européu d’Adautación a la Globalización pa Trabayaores Dispidíos, del Fondu Social Européu Plus, del Fondu a la Recuperanza pa la Cohesión y los Territorios d’Europa y del Mecanismu de Recuperación y Resiliencia.
Y cuandu mos interesamos por si’l Gobiernu PSOE-Unidas Podemos pidió que la Comisión Europea intervenga na grave cris que suponen los planes de reconversión d’Arcelor Mittal, Nicolas Schmit reconoz que l’Estáu español nun contautó pa ná con ellos.
La iniciativa d’Andecha Astur, al traviés de los sos socios d’EH Bildu, preba que’l conflictu d’Arcelor Mittal sólo se podrá reorientar, comu dixo nel so momentu’l Conceyu Abiertu de trabayaores y la seición sindical de la CSI, con una llucha activa de la plantía y el sofitu de la sociedá asturiana. Nesta situación nun se pue aceutar la calma que, de mou cómpliz, aconseyen los partíos españoles. Nun val engañase: sólo la presión sobro la empresa 4 y sol Gobiernu d’Adrián Barbón permitiría forciar la posición del Gobiernu PSOE-Unidas Podemos, favoratible a dexar carta blanca al señor Aditya Mittal.
Les rempuestes que mos da’l Comisariu Européu convierten al Gobiernu español, cola complicidá de la sucursal d’Adrián Barbón, en culpables d’un nueu y grave episodiu de desindustrialización d’Asturies si permiten qu’Arcelor Mittal desanicie 1000 emplegos y amenorgue en más d’un millón de tonelaes la so produción.
Andecha Astur va dar treslláu d’esta carta de la Comisión Europea a los trabayaores d’Arcelor Mittal, que tuvieron hai poco un alcuentru en Madrid con tres diputaos d’EH Bildu, nel marcu d’un alcuentru que facilitó Andecha Astur pa les plantíes d’empreses en cris que n’Asturies tán lluchando pol futuru de toes y toos. Y siguiremos sofitando a toles empreses en llucha. ¡ ASTURIES SÁLVASE LLUCHANDO !
