Inicio > Asturies > Andecha Astur lleva a Europa la llucha de los trabayaores d’Arcelor
AsturiesInternacionalXunión Europea

Andecha Astur lleva a Europa la llucha de los trabayaores d’Arcelor

El parllamentariu européu Pernando Barrena, d’EH Bildu y la coalición “Agora Repúbliques”, na que ta integrá Andecha Astur, acaba presentar a la Comisión Europea una riestra entrugues sobro la cris llaboral prevocá por Arcelor-Mittal n’Asturies, a la que los trabayaores tán retrucando con fuelgues ya otres iniciatives de defensa obrera.

Andecha Astur tresllada asina esti importante conflictu llaboral al ámbetu européu, del que la empresa siderúrxica recibe cuantiosos fondos. Arcelor-Mittal, cuyes istalaciones n’Asturies tienen el so orixe na empresa pública Ensidesa que privatizó l’Estáu español, recibe aídes públiques millonaries comu compensación polos costes d’emisión indireuta de CO2, asina comu beneficios importantes cola declaración de los ERTEs. Per otru llau, Arcelor-Mittal Investigación y Desenrollu, SL tamién recibió sovenciones millonaries de les alministraciones públiques, siendo toes estes inversiones feches a fondu perdíu.

Por embargu, los planes de restructuración de la empresa n’Asturies suponen la prósima desapaición de más de 1000 emplegos y la redución de más d’un millón de tonelaes de produción.

Énte esta inxusta situación (sovenciones millonaries y destruición d’emplegu), Andecha Astur entruga a la Comisión Europea si ésta se plantega promover que les empreses que reciben aídes europees a fondu perdíu tengan, comu compensación, que garantizar el so raigañu nel territoriu.

Tamién entrugamos si la Comisión Europea va tomar dalguna iniciativa pa torgar que la empresa Arcelor-Mittal recorte 1000 puestos de trabayu o si, nel casu contrariu, va aperiar dalgún plan pa compensar les consecuencies d’esta nuea reconversión.

Amás entrugamos si la Comisión Europea recibió dalgún pidíu por parte’l Gobiernu español pa intervenir nesta grave cris y pa torgar los planes ruinosos qu’Arcelor-Mittal tien pa coles sos istalaciones n’Asturies.

Al tiempu que llevamos el conflictu a Europa, denunciando la pasividá cómpliz de los Gobiernos español y de Barbón, sofitamos otra vuelta les vindicaciones que tán defendiendo na cai los trabayaores de CSI y CCOO.

P’Andecha Astur esti camín de facilitar iniciatives istitucionales pa la defensa de la clas trabayaora asturiana preba lo acertao de la so estratexa: siguir costruyendo una alternativa política auténticamente d’esquierdes pa una Asturies que defenda por sí mesma los sos intereses.

 

Deja un comentario

Tu dirección de correo electrónico no será publicada. Los campos obligatorios están marcados con *