Inicio > Asturies > Barbón lleva al HUCA acullá d’una situación crítica
AsturiesLlaboralPortadaSanidá

Barbón lleva al HUCA acullá d’una situación crítica

Pal PSOE la sanidá pública nun ye prioridá

El testu que compartimos darréu nun ye un testimoniu más. Ye’l rellatu d’un trabayaor de la Sanidá Pública Asturiana, Miguel Ánxelu Agudo Rodicio, comprometíu con Asturies y militante d’Andecha Astur; una presona que trabaya nel HUCA y que, amás de dar ca díi lo meyor de sí comu profesional, considera necesario que les asturianes y asturianos conozan la braera situación de la nuesa sanidá. Porque conocer la rialidá ye’l primer requisitu pa poner camudala.

La información que con toos comparte Miguel Ánxelu dexa ver a les clares que la situación de cris sanitario que güei carecemos nun ye’l sólo la consecuencia d’un andanciu. Ye’l resultáu de llargues décades de desinversión y reconversión del sistema sanitariu públicu d’Asturies, un procesu del que son responsables los estremaos partíos españoles que, colos criterios más contundentes del mercantilismu lliberal, gobernaron y gobiernen la sanidá n’Asturies y nel Estáu español.

Espublizando esti documentu, Andecha Astur quier facer un llamáu a la población asturiano a defender por tolos medios la nuesa sanidá y a retrucar activamente’l discursu conformista y publicitariu con que’l Gobiernu d’Adrián Barbón intenta eludir les sos gravísimes responsabilidaes, al tiempu que fae cayer culpes sobro la ciudadanía y se xustifica acusando a Madrid de nun-y dar competencies, al tiempu que se ñega a exercer les que sí tien.

N’Andecha Astur creyemos que ye posible otra política sanitario y que les asturianes y asturianos tenemos drechu a una sanidá pública de calidá. Pa ello ye imprescindible siguir xuniendo esfuercios al rodiu de compromisos que, comu los de Miguel Ánxelu, ponen los intereses d’Asturies perriba los presonales y los del sistema. ¡Vamos consiguilo!

 

Testimoniu de Miguel Ánxelu Agudo Rodicio

Los y les trabayaores de la Sanidá Pública Asturiana somos perbonos conoceores de la situación que carez Asturies anguañu por mor del andanciu’l coronavirus, y, especialmente, de la situación del nuesu principal hospital, l’HUCA. Eso sí, tolo que vamos referir equí ye responsabilidá direuta de la mala xestión que l’equipu d’Adrián Barbón executa nel ámbetu sanitariu.

A díi de güei les UCIs del HUCA cuntaben con más de 90 pacientes COVID+ ingresaos, repartíos ente les UCIs riales coles que cunta l’hospital, más un vestuariu y un xinasiu habilitaos pa tala fin, amás d’una reanimación quirúrxica destiná al usu d’UCI pa pacientes COVID+. Con ello falamos de que práuticamente nun existen yá cames pa ingresos de pacientes críticos que nun tean afeutaos pol andanciu. ¿Qué pasaría si asocede un acidente tráficu grave o cualisquier otra traxedia? O ¿qué pasa col restu patoloxíes que, pola so gafura, desixen d’ingresu n’UCI? ¿Eses presones tendrán que superar el triax de los intensivistes pa que se lluche pola so vida nuna de les disputadísimes cames de la UCI?

Nun hai enfermeres suficientes en toa Asturies p’atender la demanda asistencial, dalgo que s’entiende perbién cuando lleven décades ufiertándo-yos sólo trabayu precario, concatenando contratu tres contratu, cola so correspondiente perda de drechos llaborales, comu vacancies, turnu estable o esfrute de díes xeneraos col escesu d’hores trabayaes. Les y los enfermeros fuxen d’esti país de nueso, que sólo-yos ufre precariedá.

Agora mesmo tán destinando a les xunidaes d’UCI a enfermeres ensin formación en curiaos críticos y obligando a les que trabayen n’otres fasteres sanitaries d’Asturies a presentase a trabayar nel HUCA. Por supuestu, ensin que-yos paguen desplazamientu nin dietes, o lo aceuten o falta grave.
Lo mesmo pasa con celadores y ausiliares, munchos d’ellos llamaos pol paru y ensin DENGÚN tipu de formación sanitario. Tenemos visto dalgún celador que llega y nun sabe nin desfrenar una cama, nun falemos yá de movilizar un paciente o la famosa pronación. Evidentemente, nun ye culpa d’esos trabayaores, qu’en tou momentu dan tolo meyor de sí; pero too eso va en perxuiciu de la calidá asistencial y los únicos responsables son los miembros de l’Alministración sanitario y les xerencies de los hospitales.

La xera nes plantes de COVID ye una rialidá tán dura que’l presonal sanitariu nun pue encarialu, nestes penoses condiciones que mos llanta’l Gobiernu de Barbón, ensin graves repercusiones na so propia salú física y na estabilidá emocional. L’otru díi sintíamos nos medios españoles lo mal que tán en Madrid, porque una enfermera pue llegar a ser responsable al tiempu de cuasi venti pacientes. N’Asturies, nós en turnu de nuechi podemos vemos obligaos a atender ventidós. Ventidós seres humanos que tán embaxu la responsabilidá y curiaos d’un sólu enfermeru/a, asina ye imposible una bona praxis enfermera, imposible. Porque sí, munches vegaes pónense dellos pacientes permal al tiempu, y cuando dicimos permal falamos… de que s’afueguen.

Na tema los mélicos al cargu d’estos pacientes la cosa nun meyora. Tán internistes y neumólogos p’atender les que son agora nueve plantes enteres del HUCA, destinaes dafechu a esta patoloxía. Nun dan abastu. Y nun dan abastu porque sólo los mélicos d’eses especialidades (los intensivistes tán solo na UCI) tán al cargu d’esos pacientes, el restu mélicos llávense les manes y ñéguense a ver pacientes COVID+, esceutu un puñadín que s’ufrieron voluntarios pa char un gabitu a los sos colegues.

Anguañu tán toles intervenciones quirúrxiques sospendíes, esceutu les d’urxencia vital; eso significa que los milenta mélicos d’especialidaes quirúrxiques nin operen nin consulten. Yá munchos d’ellos na primer fola tuvieron cobrando’l sueldu en casa, eso sí, a la privá diben a facer xera. Porque esti Gobiernín nun punxo tolos medios de la sanidá privao a dimposición de la sociedá, comu manda la costitución de los españoles. El negociu ye’l negociu, yá se sabe; y eso el capitalismu respétalo. La vida to güelu o güela yá ye otra cosa… Pos bien, al tar cuásique de brazos cayíos, quixeron los internistes y neumólogos que los demás especialistes se dedicaren a ver pacientes COVID+, comu ye ñatural (la carrera melicina siguen teniéndola anque seyan ciruxanos). Mamina, glayíos nel cielu y refuga dafechu a ello, a lo que se xunció la xerencia l’HUCA dándo-yos la razón.

El resultáu ye una sobrecarga trabayu tala pa los profesionales d’Interna y Neumo, a los que-yos resulta imposible atendelo too. Cuasi mos llora una mélica cuando la llamemos porque tinía un paciente afogándose y con hemoptisis (tusir sangre), porque a esa hora yá nun daba más de sí. De toles maneres, apaecieron ella y el compañeru bien aína, porque son mélicos daveres. ¿Cuálu ye’l problema? Cuandu van entrar na fastera sucio pa ver al paciente, llámenlos d’otra planta porque ta igual otru de cincuenta y pocos años. Y ésa ye la clave, l’otru tinía cincuenta y pocos y el paciente pol que llamáremos yera vieyu y con delles patoloxíes previes, o seya, non candidatu a UCI (son los intensivistes los que faen esi triax), colo que tuvo que quitase l’EPI qu’entamare poner pa char a correr a la otra planta a ver qué facer con esi otru paciente. El paciente pol que llamáremos morrió esi mesmu díi. ¿Yera vieyu, con patoloxíes previes y descartáu pa la UCI? Sí. Pero siguía siendo una presona activa, con una vida de lo más normal y tol xacíu del mundiu. Ye d’una impotencia que naide nun se pue nin maxinar.

Pero nun falamos sólo del drechu a vivir de los güelinos: la media d’edá de los enfermos ingresaos nes UCIs ta agora mesmu perbaxu los 70 años. Comu “anéudota” sinificatible: esta nuechi cuasi mandamos pa intubar na UCI a una mocina de 19 años, nel díi’l so cumpleaños.

Los muertos hai díes que son tantos que nin siquier se tienen refrixeradores pa toos nos mortuorios.

Asina de grave ye la situación del HUCA y de la Sanidá Pública Asturiana. Asturies tien de sabelo.

 

 

One thought on “Barbón lleva al HUCA acullá d’una situación crítica

Deja un comentario

Tu dirección de correo electrónico no será publicada. Los campos obligatorios están marcados con *