Inicio > Asturies > Por una Oficialidá de plenos drechos
AsturiesLlingua AsturianaPortada

Por una Oficialidá de plenos drechos

Nesta selmana de les lletres, Andecha Astur reivindica la oficialidá de la llingua asturiana ensin recortes, igual que la de los demás pueblos del Estáu, y denuncia la “oficialidá amable” del PSOE como una continuación de la so política llingüicida y antiasturiana

Con ésti van yá 42 años que la nación asturiana tien de cellebrar la Selmana de les Lletres Asturianes pa vindicar que se-y reconozan los mesmos drechos llingüísticos qu’a los demás Pueblos del Estáu con llingua propio. Y nun son 42 años, porque yá muncho enantes la xente asturiano vindicaba la so identidá y yera espreciao y castigao por ello nes escueles, nos tayos, nes lleis, na prensa…

En tou esi tiempu de represión Asturies tuvo somorguiá al poder de partíos españoles. Y, quitando pequeños retayos temporales, nesi llargu tiempu de castigu y represión la nuesa nación astur tuvo embaxu’l poder españolista, llingüicida, asturfóbicu… del PSOE. Que nun recoyó la oficialidá nel estatutu que mos impunxeron dende Madrid y que sofitó estratéxicamente los ideales facistes que Vox representa anguañu, reprimiendo l’asturianu, sofitando les polítiques de disgregación/asimilación llingüística y de galleguización del ocidente asturianu.

Nesta Selmana de les Lletres, Andecha Astur costata’l perimportante avance haza la normalización democrática nel tarrén llingüísticu, la presión social caltenida ta forciando a que los mesmos responsables de la situación represiva tean que ceder y escomenzar a asumir la oficialidá de la nuesa llingua nacional como un fechu inreversible, y ye precisamente por eso polo que tan afayando’l so discursu llingüicida y asturfóbicu a esa rialidá que nun son quien a contener, de tala miente que non solo retrasen la inevitable oficialidá, sinon que pretenden que mos conformemos con polítiques de xestos ensin conteníos, y con una oficialidá desnaturalizada que nun reconoz dafechu los drechos llingüísticos d’asturianes y asturianos.

Ello asina, Andecha Astur quier denunciar les politiques coles que’l PSOE intenta tracamundiar el procesu de normalización llingüística, con un discursu nel que:

1º.- Pretende vincular la vindicación de la reconocencia de la oficialidá de la nuesa llingua cola xeneración de conflctos d’entendimientu.

Eso ye lo que fai el PSOE al aceutar como una quexa xusta y normal el matonismu de VOX cuandu afirma que “nun atalantamos l’asturianu”  y guetando posibles soluciones alministratives pa esi supuestu conflictu d’entendimientu, que tola sociedá asturiana sabe que nun esiste.

Al PSOE interesa-y da-y cancha a un mostru que faiga de contrapesu a los avances y que lu llibere a élli de ser el responsable de la represión llingüística, presentando la so postura asturfóbica como “racional y centrada” frente a los estremismos. Al dar carta de naturaleza a los posicionamientos de VOX, el PSOE da-y aliendu al mostru porque asina pue acusar a los asturfalantes de xenerar problemes de convivencia y entendimientu si son mui “radicales” nos sos pidíos d’oficialidá y normalización.

2º.- Los “reblagos de curtiu algame”. Como mecanismu de contención de la oficialidá, el PSOE ta llevando dende la Conseyería Cultura del “Principado” una politica de xestos que dan la impresión de ser avances haza l’oxetivu democráticu d’oficialidá, pero qu’en rialidá nun suponen dengún progresu rial al nun reconocer nin garantizar los drechos llingüísticos, pero qu’aíden a caltener una rede clientelar, y a xenerar una falsa sensación de normalización llingüística y de compromisu del PSOE cola llingua asturiana.

Ye nidio qu’aumentado’l númberu premios a los creaores en llingua asturiana, o –la postrer ocurrencia- regulando un sellu calidá pa los comercios que respeten la identidá llingüística’l país, nun s’avanza un res haza la reconocencia de los drechos llingüísticos de los asturianos. A la escontra, nun son más que mecanismos pa mazcaritar la represión llingüística y de contención social de la propia oficialidá.

Naide nun pue creyer qu’asina s’avanza haza la normalización, porque ensin una declaración formal d’oficialidá lo demás son caxigalines coles que mazcarar la represión llingüística cola que se taraza lo fundamental. Los reblagos de curtiu algame nun son más qu’espluma, puru engañu.

.- La “Oficialidá amable”. La postrer llinia defensiva de la política llingüicida del PSOE n’Asturies ye la “oficialidá amable”.

Enfrentaos a la rialidá de que coles dos polítiques enantes descrites –la del supuestu conflictu llingüísticu que supondría la oficialidá, y la de reblagos de curtiu algame- y la imposibilidá de siguir retrasando etenramente l’alderique políticu de la oficialidá, el PSOE presenta como postrer llinia defensiva una oficialidá que nun seya tala. Una carta de drechos llingüísticos na so mínima espresión –inferior nel fondu y la forma a la que tienen reconocíos los demás Pueblos del Estáu con llingua propia ya incumpliendo tolos trataos internacionales en materia de drechos llingüísticos- cola qu’acallantar la vindicación llingüística y conseguir evitar que la llingua asturiana seya llingua vehicular nel enseñu, que l’alministración pública tenga por méritu y necesidá la conocencia l’asturianu, que l’aición de les alministraciones públiques xorreza y s’esprese na nuesa llingua, que se priorice y se favoreza la convivencia social n’asturianu… Lo que supón que l’asturianu nun tendrá nin l’estatus xurídicu que-y correspuende, nin drechos suficientemente reconocíos, nin futuru garantizáu.

Poro, una reforma del Estatutu d’Autonomía que mos impunxeron dende Madrid a los asturianos, que nun recueya una oficialidá de plenos drechos supondríe un retrocesu bien difícil de superar, darréu que baxo l’apariencia d’una normalización democrática en drechos llingüísticos, supondríe la continuación de forma “amable” de la represión llingüística que carecemos n’Asturies, y l’afitamientu d’un modelu llingüísticu folclorizante, ensin futuru pa la nuesa llingua.

 

Ello asina, nesta Selmana de les Lletres, Andecha Astur perafítase na so vindicación d’una Oficialidá de plenos drechos pa la nuesa llingua nacional, y fai un llamamientu a la coherencia frente a los discursos “amables” que nun pretenden más que caltener la represión llingüística y les polítiques d’asimilación cultural, baxo una falsa apariencia de normalización democrática.

Deja un comentario

Tu dirección de correo electrónico no será publicada. Los campos obligatorios están marcados con *