El veteranu políticu d’ERC aconceyó esta mañana con Andecha Astur nel llocal de la organización en Xixón.
L’aconceyamientu permitió conocer más a fondu les rialidaes de les dos naciones, la prósima convocatoria d’elleiciones europees (Andecha Astur forma parte de la coalición europea ‘Agora Repúbliques‘ xunto con EH-Bildu y BNG) compartiendo esperiencies y valorando posibles alternatives que permitan avanzar haza la república y el socialismu, dende la nuesa condición de catalanes y asturianos/es respeutivamente.
Como davezu, tratóse d’una esperiencia bien arriqueceora na que participaron pola parte asturiana ente otros Llucía Fernández y Diego ‘Roxu’, na que quedó nidio la necesidá de comunicación y entendimientu ente les organizaciones que defendemos un espaciu políticu asemeyáu, republicanu y d’izquierdes, vinculáu al marcu específicu que costitúin les nueses respeutives naciones.
Prósimamente espérase qu’estos contautos vaigan a más, cola perspeutiva de les elleiciones europees de xunu d’esti añu, nes qu’Andecha Astur espera poder repetir la coalición ‘Agora Repúbliques’, na que participó xunto con EH_Bildu, BNK, Ahora Canarias y Puyalón, que permitió qu’Asturies toviere representada nel Parllamentu Européu con voz propia y ónde se llevaron estremaes iniciatives, especialmente nel tarrén llaboral, llingüísticu y mediuambiental, denunciando’l procesu de desindustrialización, defendiendo les microempreses queseres asturianes, y dando a conocer la represión llingüistica esistente n’Asturies, y la contaminación en Xixón.
