Nun podemos consentir que los representantes del réxime xenocida israelí pasen peles nueses cais y carreteres ensin consecuencies
La Vuelta Ciclista llega a Asturies esti vienres; en concreto, a L’Angliru (Riosa) procedente de Cabezón de la Sal, pasando per Llanes (cerca la una), Ribeseya, Les Arriondes, L’Infiestu, Nava, L’Entregu y Turón anantes d’aportar al puertu montaña. El sábadu sal a mediudíi d’Avilés pa finar en La Farrapona, pasando –pente otres llocalidaes- per Posada, Les Cruces, Veiga d’Anzu, Sograndio, Proaza, Entragu ya Tuiza, pa finar en La Farrapona. La cabera etapa per Asturies, el domingu, saldrá de Vegadeo camín de Galicia.
Nun son datos al debalu, son un mapa de los puntos nos que tar presentes –con pancartes, banderes, pañuelos…- pa denunciar la connivencia de la Vuelta Ciclista col rexime asesín israelín y desixir l’abandonu del equipu Israel Premier Tech.
Nel mesmu añu en que Palestina suma a la so llarga cuenta de muertes decenes de miles de víctimes civiles, con una mayoría de muyeres y neños, asesinaos pol exércitu d’Israel, nun podemos mirar pa otru llau. Dende l’iniciu l’ataque israelí en Gaza n’ochobre de 2023, morrieron al menos 63 557 palestinos y otros 160.660 tan ferios, con ciudaes enteres destruyíes, hospitales bombardeaos y una población sometida a un auténticu xenocidiu que la comunidá internacional nun ye quien –o nun quier ser quien- a frenar.
Ente’l silenciu cómpliz del mundiu, la Vuelta acueye la participación d’un equipu que cuerre en nome del estáu opresor: Israel-Premier Tech. La so presencia nun eventu esportivu convierte’l ciclismu nun escaparate de propaganda d’un país que viola sistemáticamente los Drechos Humanos ya’l so pasu per Asturies ye un insultu que nun pue quedar ensin rempuesta.
Poro, dende Andecha Astur animamos a tar presentes y facese ver na Vuelta Ciclista al so pasu per Asturies, dexando nidio la refuga del pueblu asturianu a la presencia de los representantes del réxime israelín. Remembramos qu’hai convocaos alcuentros n’Avilés y Llanes, seique cualisquier puntu de la vuelta ye afayaizu. Recomiéndase dir con tiempu abondo, en previsión de cortes de carretera y controles.
