Representantes d’Andecha Astur y d’ERC aconceyaron esti martes en Barcelona, nun ambiente d’intercambiu, de valoración y analís de la situación política actual, afitando el mutuu compromisu social y cola soberanía de los pueblos, especialmente énte’l contestu internacional actual y los pelligros del xorrecimientu de la drecha y la ultradrecha.
Na xunta participaron, per parte d’Andecha Astur, los miembros de la Xunta Executiva Carme Pérez y Marcos Fernández. Per parte d’ERC, asistieron Oriol López, Secretariu Xeneral Alxuntu d’ERC y diputáu nel Parlamentu Catalán, y Adriá Guevara, responsable de rellaciones internacionales.
Amás, los representantes d’Andecha Astur tuvieron la oportunidá de caltener un saludu con Josep Rull, Presidente del Parlament.
Demientres l’alcuentru, dambes organizaciones intercambiaron opiniones sobro les respeutives realidaes nacionales d’Asturies y Catalunya, compartiendo diagnósticos sobro los retos políticos, sociales y culturales que carecen dambos territorios. Nesti marcu, fixeron tamién un analís de la situación política a nivel estatal, valorando l’actual contestu institucional y los escenarios que s’abrirán col ciclu electoral.
Nel mesmu sen, compartieron analís sobre la situación política internacional y coincidieron na necesidá de reforciar los drechos sociales, el compromisu cola paz, la soberanía de los pueblos y el respetu al derechu internacional. Nesti sen, alertaron de que la deriva militarista pue tener consecuencies directes nes condiciones de vida de la ciudadanía, afeutando especialmente a les clases trabayadores y a los sectores populares.
Como respuesta, defendieron el drechu internacional, la diplomacia, la negociación y los alcuerdos ente les partes como ferramientes fundamentales pa garantizar la paz y la estabilidá.
Asina mesmo, destacaron la importancia de venceyar esfuercios ente organizaciones soberanistes d’izquierda pa defender los derechos sociales y nacionales, avanzando escontra modelos políticos que reconozan la pluralidá de los pueblos y el so derechu a decidir.
Finalmente, coincidieron na necesidá de siguir enfortiando les rellaciones polítiques y la cooperación ente les distintes fuercies que trabayen pola soberanía, la xusticia social y la democracia.
Andecha Astur y ERC caltienen dende va tiempu rellaciones estratéxiques y formen parte d’Agora Repúbliques, coalición con representación nel parllamentu européu.
