En sofitu a los/es trabayadores d’ENCE

Énte la paralización total de la planta d’ENCE en Navia pola convocatoria d’una fuelga indefinía, consecuencia direuta de l’amenaza d’un ERE que supón l’esaniciu de decenes de puestos de trabayu, Andecha Astur quier sopelexar públicamente:

1. El so sofitu ensin fiendes y la so solidaridá militante colos/es trabayadores d’ENCE, cola so llucha y coles sos families, que tan defendiendo non solo los sos emplegos, sinón el futuru económicu y social de tol Occidente asturianu.

2. La responsabilidá direuta de la empresa, que torna utilizar la chantaxe y el despíu como ferramienta de xestión, ensin tener en cuenta l’impautu social de les sos decisiones nin el papel estratéxicu que la industria tien p’Asturies.

3. La actitú vergoñosa del Gobiernu del Principáu, que una y otra vegada apaez d’adornu, calteniendo un silenciu cómpliz y mirando pa dellau mentantu se destrúin puestos de trabayu y se debilita’l texíu industrial del país. Un Gobiernu que diz defender la industria y l’emplegu, pero que cuando toca actuar nun ta nin se lu espera.

4. Dende Andecha Astur denunciamos que’l Principáu renuncia sistemáticamente a usar les sos competencies, a esixir responsabilidaes y a llantar cara a les grandes empreses cuando les sos decisiones van escontra los intereses de la clas trabayadora y del pueblu asturianu.

5. Ello asina, reclamamos una intervención inmediata, clara y efeutiva de les instituciones públiques, que vayaacullá de declaraciones vacíes, y que tenga como oxetivu irrenunciable la defensa del emplegu, de la actividá industrial y del derechu a vivir y trabayar n’Asturies.

Andecha Astur fai un llamamientu a la movilización, a la solidaridá y a la organización popular. Asturies nun pue siguir perdiendo industria mentantu’l Principáu fai de convidáu de piedra. La llucha de los trabayadores d’ENCE ye la llucha de tol país.