Inicio > Conceyos > Andecha Astur de Noreña denuncia discriminación de la Casa Conceyu
ConceyosMás noticiesMocedá

Andecha Astur de Noreña denuncia discriminación de la Casa Conceyu

Prohibióse un conciertu a un actu de mocedá d’Andecha Astur mentes se permiten a otres organizaciones

El caberu 22 d’avientu de 2018, nel marcu l’Alcuentru’18 (xorná vindicativa de la esquierda soberanista, con charres, meses reondes, murales…), la organización política Andecha  Astur tenía previstu un conciertu con músicos mozos que, col nome de Músicos Xuníos por Noreña, diben actuar n’El Prestosu Café Vintage, nesta llocalidá. Esti conciertu foi prohibíu: l’establecimientu hosteleru onde se diba facer recibió una notificación de la Casa Conceyu de Noreña, entregá pola policía llocal y firmá pol conceyal de seguranza ciudadano, D. Pelayo Suárez Colunga (Independientes por Noreña), xustamente’l díi anterior al eventu. La notificación afalaba al hosteleru a nun permitir la cellebración del conciertu nel so llocal, menaciándolu con que si nun lo facía podíen precinta-y el llocal y retira-y la llicencia municipal. Ente tan graves menacies de la Casa Conceyu sol hosteleru, Andecha Astur decidió acatar la suspensión del conciertu.

El mesmu díi, 22 d’avientu, a les 20 h., los propios músicos, mocedá de Noreña y los militantes d’Andecha Astur concentráronse espontáneamente énte la Casa Conceyu de Noreña pa denunciar la costante censura, persecución y represión de les iniciatives sociales, culturales, artístiques y polítiques en Noreña, sobremanera aquelles que xurden del puxu la mocedá. Andecha Astur vien denunciando, dende cuantayá, la persecución política continua que carez la mocedá d’esti conceyu cuandu se quier organizar. Señalamos nesti sentíu la responsabilidá del gobiernu municipal y l’alcaldesa, Amparo Antuña. Na concentración, Andecha Astur y la mocedá concentrao pidieron respetu a les sos iniciatives, que se permita realizar conciertos y s’aliten éstes y otres actividaes na cai, que se xeneren espacios pa la mocedá onde puea desendolcar los sos pruyimientos, tamién se vindicó la necesidá d’un Llar de la mocedá (un espaciu d’alcuentru empobináu a los mozos).

Andecha Astur remembra esti casu de represión y la vindicación espontánea d’aquel díi, 22 d’avientu, porque sosprendentemente vemos cómu se tán permitiendo otros conciertos en bares de la llocalidá, lo qu’al nuesu paicer amuesa ñidiamente la intención represora del gobiernu municipal de Noreña (IPÑ-Foro) cuandu torgaron aquel conciertu nel Alcuentru’18, prohibiendo facer música en vivo a un determináu establecimientu hosteleru, mentantu se permite facer n’otros.

Andecha Astur denuncia que la Casa Conceyu de Noreña prohibió a concenxa y con evidente intención de censura un conciertu a Andecha Astur, mentres permitió enantes y permite anguañu otros conciertos en Noreña. Anunciamos la nuesa intención d’afitamos nes nueses vindicaciones no que cinca a la organización d’actividaes musicales, artístiques, culturales, sociales o polítiques a nivel de cai que surdan a la iniciativa popular y, sobro too, aquelles con calter críticu y alternativu, con ánimu de tresformación social, que surdan del puxu la mocedá.

Deja una respuesta

Tu dirección de correo electrónico no será publicada. Los campos obligatorios están marcados con *