Mentantu l’Estáu español declara gratuites autopistes per tolos llaos, la del Güerna va ser la concesión más llarga que se conoz (75 años)
En viendo estos díis que la empresa Aucalsa lloraba públicamente polos sos malos resultaos na esplotación de l’autopista’l Güerna, Andecha Astur creye llegáu’l momentu de que l’Estáu español nacionalice dafechu’l seutor de les autopistes y que s’entregue al Gobiernu d’Asturies la xestión de los tramos que percuerren el nuesu territoriu. Porque lo qu’asocede cola autopista’l Güerna ye una esplotación económica discriminatoria, con abonda saña, haza’l Pueblu Asturianu.
Teníemos razón cuandu l’entós senaor Jon Iñarritu (Andecha Astur ye miembru de la coalición Agora Repúbliques) facía nel Senáu español les nueses entrugues, denunciando’l casu. Poro, ye útil la campaña d’Andecha Astur d’esti añu: “Peaxe non. ¡Ye un robu!”.
L’Estáu español enxamás nun consideró prioritario qu’Asturies tuviere bones comunicaciones haza l’esterior, porque nun entramos nos sos planes xeoestratéxicos. Fasta hai 40 años nun se mos reconoció’l drechu a una vía rápida de comunicación acullá’l Payares. Y 40 años llevamos castigaos pol Estáu español a pagar el peaxe de l’aupista’l Güerna, que recauda’n nome’l rei el Grupu Sacyr, tapecíu col nome d’Aucalsa.
El grupu Sacyr tuvo en 2019 un beneficiu brutu de 676,7 millones € (un 25,1% más que’n 2018). Sacyr sacómos 39,5 millones € pol peax en 2019. Y diz que tovía-y falten 437 millones más p’amortizar l’autopista.
Los asturianos llevamos 40 años forciaos a pagar a una empresa privá por exercer un drechu homanu básicu: entrar y salir llibremente del nuesu país. Pero l’Estáu español y Sacyr quieren allongar el sometimientu: dicen que mos falten por pagar dos tercios más.
Los partíos españoles, primero PSOE y llueu PP, avalaron esti espoliu-castigu a los asturianos, quién sabe a cambiu de qué. La concesión de l’autopista a Aucalsa finará en 2050, 75 años dempués del aniciu, y sedrá la conceción más llarga concedía nel Estáu español. D’esti mou Asturies recibe un tratu enraxonámente discriminatoriu. Mentantu’l gobiernu español declaró gratuites autopistes en Castiella, Euskal Herria, Andalucía, Catalunya, País Valençià…, ¡Asturies paga!
Pa l’autopista’l Güerna lo dicho: nacionalización del seutor y xestión asturiana.
