Inicio > Asturies > Un rei que fuxe y un modelu d’Estáu que funde
AsturiesPortada

Un rei que fuxe y un modelu d’Estáu que funde

Andecha Astur escontra la fuxía de Juan Carlos y a favor d’un alderique sol modelu d’estáu y l’estatutu impuestu a Asturies pola España los Borbones

Andecha Astur denuncia que’l comunicáu prensa asoleyáu ayeri pola Casa Rial española ye l’anuncia de fuga del so cabezaleru, obligáu poles investigaciones internacionales que tán dexando al aire’l podrigañu políticu, económicu y éticu que representa la monarquía los Borbones, magar qu’entá ye protexía pol gobiernu PSOE-Podemos y polos poderes fáuticos que guarden el modelu d’Estáu heredáu de Franco.

Énte un casu tan grave comu vergoñosu, que custiona con razón la esencia y la esistencia del Estáu español, sí paez necesario pidir, ente otres custiones, les siguientes:

  • Que si’l ciudadanu Juan Carlos de Borbón va fuxir del Estáu español, Adrián Barbón s’asegure de que nun entra nel país asturianu, porque, comu yá s’espresó na cabera visita de Felipe y Letizia: Asturies nun tien rei.
  • Que s’impida la fuga del ciudadanu Juan Carlos de Borbón a dengún país, permaneciendo necesariamente en territoriu del Estáu español, pol que diz sintir tantu ciñu.
  • Que se dediquen los recursos policiales necesarios pa garantizar que’l presuntu delincuente permaneza en tou momentu llocalizable y a les órdenes del poder xudicial español, suizu o de cualisquier otru Estáu que lu reclame comu imputáu.
  • Que se proceda a la retirá del so títulu de rei eméritu, a la denegación d’edificios públicos comu residencia y a la cancelación de cualisquier cantidá de fondos monetarios que reciba de la Casa Rial o de cualisquier fonte de la Facienda pública.
  • Que’l Gobiernu PSOE-Podemos y los demás partíos españoles nun pongan torga dala a que’l “casu Juan Carlos” seya oxetu d’una comisión d’investigación nel parllamentu español.
  • Que la Fiscalía española proceda según la llexisllación vixente con respeutu a los posibles delitos que pudo cometer el ciudadanu Juan Carlos de Borbón, precurando un tratamientu xudicial exemplar del so casu.

En tou casu, ná permite señalar a Juan Carlos comu responsable únicu de la situación insostenible na que s’atopa la Casa Rial española, entera. Porque, anque sólo seya por conocer la situación, toos ellos son polo menos cómplices. Los munchos años de reináu con que los Borbones castigaron al Estáu español siempres se carauterizaron por escándalos rellacionaos con ganancies ilícites, actividaes inmorales y, sobro too, por un paripé fáutico-istitucional que mazcaraba la monarquía de réxime democráticu.

A lo cabero, Andecha Astur llama a la ciudadanía asturiano a abrir un tiempu de reflexón y alderique sobro la rellación d’Asturies col Estáu español, señalando la conveniencia de desaniciar los marcos xurídico-políticos que, comu’l “Estatutu d’Autonomía” son una consecuencia impuesta por una transición mal fecha del franquismu y una norma que se prohibió votar. Nos caberos 40 años pudimos comprebar cómu la imposición d’un estáu español y monárquicu ye dalgo que-y sienta mal a Asturies, tanto nel aspeutu políticu, comu socioeconómicu, llaboral, medioambiental, cultural… Poro, convitamos a abrir esi alderique que guete nuees fórmules pa garantizar un futuru de xusticia, prosperidá y llibertá pal pueblu asturianu.

Deja un comentario

Tu dirección de correo electrónico no será publicada. Los campos obligatorios están marcados con *