Inicio > Asturies > ¡Republica Asturiana, socialista y soberana!!
AsturiesPortada

¡Republica Asturiana, socialista y soberana!!

L’ésitu del manifestamientu del Díi de la Nación Asturiana supón un pasu alantre na xunidá d’aición baxo’l principiu de la Soberanía y la República

Mentes el gobiernu del “Principado” llimitaba la so actividá istitucional nesta xornada a dir a misa en Cuadonga, y el restu de los partíos con representación istitucional achantaben vergoñosamente nesta xornada, el pueblu asturianu tuvo la oportunidá de manifestar el sofitu a una Asturies Soberana gracies a la convocatoria xunitaria d’Andecha Astur conxuntamente con una ventena d’organizaciones, que supimos priorizar lo que mos xune frente a les diverxencies puntuales, baxo’l llema de “Asturies Nun Tien Rei”, pa reclamar p’Asturies la Soberanía y la Republica.

Asturies demostró ayeri na cai que tenemos ganes, ilusión y manes pa empobinar el futuru’l nuesu país haza una república socialista dirixía polos trabayaores. Un millar de presones participó nel manifestamientu que, con motivu del Díi de la Nación Asturiana, se fexo peles cais de Xixón. Un millar de voces que, en nome d’Asturies, glayaron escontra la monarquía española y la esplotación capitalista, desixendo drechos sociales, república, socialismu y autodetermín.

Facía tiempu que nun se daba una rempuesta d’esti altor. Un manifestamientu bayurosu qu’entamaba con una asturina de proporciones descomanaes. Una pancarta común: “Asturies nun tien rei”. Numberoses pancartes de les organizaciones convocantes y d’otres allegaes. Pancartes y un discursu de los trabayaores d’empreses en llucha. Glayíos vindicativos, música, petardos… Un discursu final, mui vindicativu, lleíu na Plaza’l Parchís, ente la Casa Blanca, la que foi sé del Conseyu Soberanu d’Asturies y Lleón, que presidió Belarmino Tomás en 1937.

Ayeri salimos a la cai…

  • A afitar qu’Asturies nun tien rei y desixir el desaniciu la monarquía borbónica, heredera de Franco.
  • A denunciar al Estáu monárquicu español, por represor y corrutu.
  • A refugar la transición que travistió’l facismu en democracia burguesa parllamentaria.
  • A dicir que nun queremos Costitución española nin Estatutu d’Autonomía.
  • A vindicar un poder obreru y popular.
  • A vindicar la hestoria d’Asturies, siempres comprometía cola llucha obrera pola xusticia social, la llibertá y el gobiernu de sí mesma.
  • A rindir honores a los que morrieron lluchando escontra’l facismu, el nazismu y la transición.
  • A desixir pa ellos una llei integral de memoria que conceda verdá, xusticia y reparación.
  • A lluchar por una alternativa republicana que convierta en protagonista a la clas trabayaora, fine col capitalismu y reconoza’l drechu los Pueblos al autodetermín.
  • A vindicar los drechos de les y los trabayaores, campesinos, ganaeros, pescaores, paraos, muyeres, colleutivu LGTBI, mocedá, emigraos… A defender la oficialidá y el padremuñu hestóricu y cultural.
  • A reconocer qu’Asturies ye un país ricu, capaz de sostener un pueblu y permiti-y desendolcar un proyeutu de vida sofitáu na xusticia social, nel progresu y na igualdá.

L’esitosu manifestamientu d’ayeri ye la preba de que’l llabor xunitariu a favor d’Asturies y de la so clas trabayaora da frutos bien granibles. Dos meses lleven collaborando na plataforma “Asturies nun tien rei” una riestra d’organizaciones: AndechaAstur, Anticapitalistes Asturies, Bloque Críticu, Centros Sociales d’Asturies, Comité pola Amnistía, Compromisu por L.lena, CSI, Darréu, FAMYR, JCE m-l, Lluchando pola Soberanía, UJCE y un garapiellu de collacies y collacios anarquistes.

Pervese que ye un frente ampliu y plural de la esquierda alternativa d’Asturies. Pos en dos meses de xera intenso féxose frente a la cabera visita de los Borbones a Asturies, desinfestáronse simbólicamente los llugares que visitaron, camudóse’l nome de l’Avenía Juan Carlos I con una nuea placa que la bautiza comu “Asturies nun tien rei”, protestóse ente la “Fundación Princesa d’Asturies”, repartiéronse pegadielles y cartelos per Asturies col testu “Asturies nun tien rei” y féxose’l manifestamientu del Díi de la Nación Asturiana.

Esti llabor foi posible porque toles organizaciones que mos aconceyamos tamos convencíes de qu’Asturies tien y pue superar esta situación d’estancamientu, onde se debilita goberná por una socialdemocracia lliberal, española y collaboracionista del réxime borbónicu. Toes y toos sabemos que PSOE y los sos sofitos (IU, Podemos) nun son la solución d’asturies, son el só cáncanu. Y toes y toos coincidimos en que ta nes nueses manes texer una alternativa social y política al réxime vixente.  Con compromisu, con esfuerciu presonal, col protagonismu del consensu… ye posible y demostróse. Asina que tenemos d’avanzar pa enanchar y asegurar el llabor xunitariu de quien comparta unos puntos básicos na defensa d’Asturies y la so clas trabayaora.

Nesi sen s’esforciaron estos meses toles organizaciones de la plataforma “Asturies nun tien rei”. Y de xuru que nesi camín siguiremos avanzando toes dende esti 8 setiembre. Porque creyemos nesta xera y porque la xente salió con nós a la cai a dicir que sí, qu’esi ye’l camín.

Persabemos qu’Asturie tien futuru ensin monarquía española y ensin capitalismu. Poro, Andecha Astur y toles organizaciones van esforciase pa reforciar el llabor a comuña, el consensu sociopolíticu algamáu y la movilización.

Comu se dixo ayeri: “A partir d’esti 8 setiembre toes y toos vosotros siguiremos caminando xuntos, porque tenemos un deber pa cola hestoria”. Sólo mos queda convidate a sumar el to compromisu a esta xera, a participar nel trabayu diariu desta plataforma, a movilizate con nós. Esperámoste.

 

 

Deja un comentario

Tu dirección de correo electrónico no será publicada. Los campos obligatorios están marcados con *