La prorroga illegal del peaxe, y los abusos d’AUCALSA, desixen actuaciones concretes acullá de los discursos vacíos y les frases grandilocuentes d’Adrián Barbón
La realidá del peaxe de la Autopista del Güerna (AP-66) ye una ofensa permanente a Asturies. Un peaxe abusivu, heriedu d’una prórroga ilegal, que sigue cobrándose íntegramente nunha infraestructura en plenes obres, con retrasos, cortes y un serviciu mermáu que perxudica a la ciudadanía, al tresporte profesional y a la economía del país.
Dende Andecha Astur denunciamos que’l Gobiernu del ‘Principado’, y más concretamente’l so presidente Adrián Barbón, lleva selmanes encadenando grandes dichiaraciones mediátiques ensin denguna concreción real. Asturies nun necesita más titulares: necesita aición política inmediata y midíes concretes que mos defendan frente a esti abusu.
El problema ye Madrid, la prórroga illegal y el servilismu del ‘Principado’, pero tamién d’Aucalsa, concesionaria de la AP-66, brazu executor del cobru y de la opacidá, imponiendo tarifes descomunales por un serviciu qu’agora mesmo nun se presta con mínimes garantíes de calidá, fluidez y compensación al usuariu.
Esiximos al ‘Principado’: aición política y xurídica inmediata
- Entamar de forma urxente un recursu contencioso-alministrativu y toles aiciones xudiciales que procedan escontra’l Gobiernu español pa declarar nula la prórroga del peaxe, por vulneración de la normativa de competencia y tresparencia.
- Suspender cautelarmente el cobru del peaxe mientres se resuelve la nulidá de la concesión, y mentanto la vía siga en obres y con serviciu mermáu.
- Convocar una Comisión d’emerxencia institucional y social n’Asturies, con ayuntamientos, sindicatos, empresarios y plataformes cíviques, pa definir una estratexa común de defensa de la mobilidá y de la economía del país.
- Aumentar la presión institucional en Madrid, con iniciatives parlamentaries clares que busquen la reversión de la vía a titularidá pública ensin peaxe.
- Garantizar tresparencia y rendición de cuentes, creando un portal públicu onde se detallen pasu a pasu les aiciones y resultaos.
Esiximos al ‘Principado’ a faer frente a Aucalsa: usar les competencies que tien yá
- Abrir espediente sancionador inmediatu dende la Conseyería competente por incumplimientu de calidá del serviciu y posible vulneración de los derechos del consumidor.
- Esixir la devolución o compensación del peaxe a les persones afectaes polos retrasos y cortes d’obres, aplicando’l principiu de pagamientu por serviciu efectivu, non por serviciu fallíu.
- Fiscalizar la seguridá y la fluidez de la vía mientres duren les obres, con auditoríes téuniques independientes y públiques.
- Obligar a bonificaciones del 100% en tramos en obres y en retenciones graves, como midida mínima de responsabilidá social empresarial.
- Reclamar en vía alministrativa y civil los daños económicos indireutos, a transportistes y sectores productivos afectaos.
- Crear un sistema d’información en tiempu real fiscalizáu pol ‘Principado’, non controláu pola empresa, pa evitar opacidá y manipulación.
- Auditar les cuentes y beneficios reales de la concesión, pa demostrar cuánto se cobra, cuánto se invierte y qué margen d’abusu se ta produciendo.
Si Madrid ye quien sostién la prórroga, Aucalsa ye quien sostién la barrera del peaxe cada día. Y el ‘Principado’ tien ferramientes llexales pa defenderlos derechos ya intereses de los asturianos/es pese a tener ferramientes llegales que nun ta poniendo en marcha, recurriendo a discursos vacíos y frases grandilocuentes.
Nun ye aceptable más parálisis institucional nin empresarial.
