Una dellegación d’Andecha Astur caltuvo ayeri en Barcelona una entrevista col presidente d’ERC, Oriol Junqueras, nel marcu los alcuentros políticos que la organización ta desarrollando en Catalunya.
L’alcuentru, de calter cordial, sirvió pa treslladar un saludu formal y reforciar los venceyos políticos ente dambes organizaciones, que caltienen dende va tiempu una rellación de collaboración y coincidencia en plantegamientos estratéxicos espeyaos ente otres formes na alianza, nel Parllamentu Européu, dientru la coalición Agora Repúbliques
Dende Andecha Astur valórase positivamente esti contautu, que permitió un intercambiu breve d’impresiones sobro la situación política actual y los principales retos que carecen los pueblos del Estáu, especialmente no rellativo a la defensa de los drechos sociales, la democracia y la soberanía.
Esti alcuentru insxrtase nel procesu de fortalecimientu de les rellaciones con otres fuercies soberanistes, col oxetivu de siguir venceyando esfuercios na defensa de los intereses de los pueblos y na construcción d’alternatives polítiques que reconozan la pluralidá nacional.
Andecha Astur perafita asina’l so compromisu col diálogu, la cooperación y la construcción d’aliances con organizaciones que comparten la defensa del drechu a decidir, la xusticia social y la democracia.
