Andecha Astur convoca pal llunes 12 d’ochobre los homenaxes a los Mártires de Carbayín, a les 12:30 hores en Siero, y al presidente Belarmino Tomás, a les 13:30 hores en Llangréu, baxo’l lema «Memoria y futuru».
Dende Andecha Astur convocamos al pueblu asturianu a participar nuna nueva xornada d’homenaxe a los homes y muyeres de la Revolución d’Ochobre de 1934. Nel so 92 aniversariu, damos continuidá a los homenaxes que venimos entamando pa reconocer a quienes llucharon polos drechos de la clas trabayaora y pola capacidá del nuesu pueblu pa decidir el so futuru.
Nel enfrentamientu del pueblu col facismu, conocer los nuesos referentes ye una necesidá. La memoria d’Ochobre ayúdanos a entender el valor de la solidaridá obrera, la organización popular y el compromisu colectivu. Recuperala implica estudiar aquella esperiencia, comprender les sos contradicciones y deprender d’ella pa defender güei les llibertaes y los drechos sociales.
El primer actu tendrá llugar a les 12:30 hores nel cimenteriu de Carbayín, en Siero. Ellí recordaremos a los 24 Mártires de Carbayín, asesinaos na represión que siguió al aplastamientu de la Revolución. La so alcordanza obliga a reconocer la violencia exercida contra’l pueblu trabayaor y el sufrimientu de les families que caltuvieron viva la memoria de les víctimes.
A les 13:30 hores, nel cimenteriu de Pando, en Llangréu, celebraremos l’homenaxe énte la tumba de Belarmino Tomás, dirixente de la Revolución de 1934 y, darréu, presidente del Conseyu Soberanu d’Asturies y Llión en 1937. La so trayectoria xune la tradición obrera asturiana con una esperiencia de soberanía que forma parte de la nuesa hestoria política.
Como defendimos n’anteriores homenaxes a Ochobre, el reconocimientu a esti pasáu acompaña’l nuesu compromisu cola República Asturiana. Reivindicamos un proyeutu de tresformación social nel que’l pueblu asturianu seya protagonista y nel que les decisiones sobre’l país respuendan a les necesidaes de quienes vivimos y trabayamos nél.
Pa nós, la defensa de la soberanía ta venceyada a la xusticia social. Queremos una Asturies con capacidá pa defender el so trabayu, los sos servicios públicos, la so llingua y el drechu de les xeneraciones nueves a construyir equí’l so futuru. Esa ye la perspectiva dende la que miramos a los referentes que vamos homenaxear.
La eleición del 12 d’ochobre forma parte d’esi posicionamientu. Nesa fecha, na que l’Estáu español celebra la Hispanidá, reivindicamos la hestoria propia d’Asturies y espresamos el nuesu refugu del colonialismu. Facémoslo dende la solidaridá ente los pueblos y la defensa del so drechu a decidir llibremente.
«Memoria y futuru» espresa’l compromisu de tresmitir estes esperiencies y dar continuidá a la defensa de los drechos colectivos. L’antifacismu esixe organización cotidiana, formación y una respuesta solidaria ante los discursos d’odiu y los intentos de enfrentar a la clas trabayaora. Honrar a quienes nos precedieron implica asumir tamién esa responsabilidá nel presente.
Esti llunes 12 d’ochobre convidámosvos a acompañanos en Carbayín y en Pando. A recordar a les víctimes, conocer los nuesos referentes y compartir el compromisu con una Asturies llibre y socialmente xusta.
Llunes 12 d’ochobre de 2026 · Carbayín 12:30 h · Pando 13:30 h
