Barbón pieslla la mayoría los consultorios periféricos y sigue ensin iniciatives pa llevar Internet a toa Asturies, forciando a la emigración a l’Asturies Rural
Pronto habrá un añu qu’Adrián Barbón publicitó’l nomamientu de Jaime Izquierdo comu Comisionáu pal Retu Demográficu. Un añu perdíu na recuperanza de l’Asturies rural y de los niveles poblacionales porque’l Comisionáu nun xeneró denguna política activa y paez espertu sólo en declarar evidencies: “una aldega na que naide nun cultiva ná, nun ye una aldega”, o “nun queda munchu tiempu pa recuperar la memoria campesino”.
Nun queda munchu tiempu y el qu’hai Barbón ta malgastándolu, amosando que nun tien soluciones pa recuperar Asturies, especialmente los territorios del ocidente y del oriente, les conocíes comu esnales del país.
Ye más, faltu de polítiques y presupuestu, el PSOE de Barbón continúa la llamentable política arecista: castigar les esnales del país, ñegándo-yos custiones básiques pa una vida caltenible y de calidá. Asina se ve no qu’asocede cola atención sanitario y l’usu d’Internet.
El presidente Barbón y la so Conseyería de Sanidá anecien en caltener pesllá fasta’l 30 setiembre bona parte la rede de consultorios periféricos d’atención primario, especialmente nel ocidente y oriente del país, afeutando a les fasteres rurales.
El Gobiernu escúsase unes vegaes tres supuestos conseyos de prevención de riesgos llaborales, otres quier xustificalo comu una “desescalá na prestación de sirvicios sanitarios”. La rialidá ye otra más mísere: el PSOE de Barbón quier aforrar, a costa la salú los asturianos, seyes meses de foncionamientu d’esos centros.
Nin siquier nel empiezu de la cris del coronavirus foi razonatible esti pieslle de centros. Lo único qu’amuesa, énte’l grandonismu de Barbón de que tenemos un gran sistema sanitariu públicu, ye la incapacidá d’atender permanentemente les necesidades sanitaries de les esnales d’Asturies. Esta doliosa rialidá ta castigando especialmente a la población de mayor edá y a la que nun tien recursos pa costease tresportes privaos fasta los centros de salú más averaos.
Pa con ello, el PSOE de Barbón sigue ensin tomar denguna mídía pa garantizar l’usu d’Internet en tol territoriu asturianu, dalgo que ye una condición estratéxica básica pa posibilitar otres midíes de desenrollu económicu y estabilidá poblacional, lo mesmo que pa situaciones urxentes de salú (comu se vio nel caberu acidente nes agües del Cares o comu noten tolos díis los agricultores, ganaeros, montañeros, pescaores…).
Andecha Astur denuncia qu’estes polítiques del PSOE empioren la calidá de vida de los pueblos asturianos y fuercien a la so población a refuxase nes ciudaes o guetar meyores condiciones fora d’Asturies. Poro, Andecha Astur desixe al presidente Barbón que convoque una sesión estraordinaria del Plenu la Xunta Xeneral pa presentar ellí un plan urxente d’atención sanitario y cobertura d’Internet n’Asturies rural.
