Andecha Astur reclama al presidente del Gobiernu asturianu, Adrián Barbón, qu’impulse una negociación col Estáu pa reclamar les competencies ferroviaries y la supresión definitiva del peaxe del Güerna. La dimisión d’Óscar Puente y l’asunción temporal de les funciones de Tresportes por Carlos Cuerpo abren una nueva situación política na que Barbón tien que poner sobro la mesa les necesidaes d’Asturies con demandes concretes, financiamientu y plazos de cumplimientu.
La responsabilidá del presidente asturianu ye defender los intereses del país énte cualesquier responsable ministerial. El cambiu nel Ministeriu tien que servir pa desbloquiar les reivindicaciones pendientes, ensin convertir el relevu nin el calendariu electoral nuna nueva escusa p’aplazar soluciones. Asturies precisa un Gobiernu que negocie con firmeza y que rinda cuentes de los resultaos.
Andecha Astur defende una tresferencia efeutiva de les competencies sobro los servicios ferroviarios internos, especialmente Cercaníes y la rede d’anchu métricu, acompañada de financiamientu suficiente y estable, personal y medios materiales. Esa negociación tien qu’incluyir compromisos verificables d’inversión y caltenimientu de les infraestructures, garantíes pa los derechos de les plantíes y mecanismos de control públicu. Asturies tien que poder decidir sobro les frecuencies, los horarios y la coordinación del tren col restu del tresporte públicu, atendiendo a les necesidaes de la población y del territoriu.
Respeuto al Güerna, la organización reitera la so demanda de nacionalización y xestión asturiana de l’autopista, que yá defendía en 2020. La supresión del peaxe tien que formar parte d’una política que garantice unes comunicaciones accesibles y al serviciu del país. El sobrocoste que soporten les families, les persones que se desplacen por trabayu y les empreses asturianes esixe una solución definitiva.
El Gobiernu asturianu yá anunció actuaciones xudiciales escontra la negativa del Ministeriu a revisar la prórroga de la concesión hasta 2050, de les que nun se sabe un res. Andecha Astur reclama qu’esa vía s’acompañe d’una iniciativa política sostenida: un aconceyamientu urxente col responsable de Tresportes, una propuesta formal de negociación ya información pública sobre los compromisos y plazos que s’algamen.
Barbón tien la responsabilidá de demostrar con fechos que la defensa d’Asturies prevalez sobro la disciplina del so partíu. Un ferrocarril públicu, seguru y útil, y unes comunicaciones llibres del peaxe del Güerna son reivindicaciones que tienen que traducise en decisiones. Asturies precisa capacidá pa decidir y recursos pa faer efeutivos los sos derechos.
Semeya: composición con IA a partir d’una semeya d’archivu d’Andecha Astur y una fotografía ferroviaria de DIBBravo (CC0).
